غادة عادل عن إمكانية زواجها مرة أخرى: ولادي رجالة.. ولو طليقي عملها هيساعدني
حلت الفنانة غادة عادل ضيفة على برنامج أنا والقناع تقديم الإعلامية منى عبد الوهاب، وكشفت العديد من الأسرار في حياتها الخاصة إلى جانب حديثها عن علاقتها بطليقها المخرج مجدي الهواري.
وقالت غادة عادل خلال لقائها عبر قناة الحياة عن طليقها مجدي الهواري: بمدح فيه عن اقتناع ودلوقتي بمدح فيه أكتر لأنه ما عملش معايا حاجة وحشة.. إحنا اه كنا بنتخانق والحياة والعيال ونوصل لطريق مسدود، ولكن اكتشفت رجولته الحقيقية مع الوقت.
غادة عادل: تأكدت أن مجدي كان لازم يكون أبو ولادي
وأضافت: كل سنة بتمر عليا دلوقتي بعد الانفصال بتأكد أن مجدي كان لازم يكون أبو ولادي، وسند ليا في كل مراحل حياتي ومش بلاقي غير كل الخير منه.
وعن إحساسها في حال تزوج مرة أخرى قالت: لو اتجوز هفرح له جدًا من قلبي، لأنه يستاهل ويستحق قعد كتير تقريبًا 6 سنين ما أتجوزش وعلاقتنا كلها مودة ورحمة.
ما أقدرش أقول مش هتجوز تاني
كما ردت غادة عادل على سؤال حول إمكانية زواجها مرة أخرى، قائلة: أنا ما أقدرش أقول لأ لكن عندي اعتبارات كتير، لأن الأولاد ممكن يستوعبوا أن والدهم اتجوز وما يستوعبوش أن مامتهم تتجوز، خاصة أن ولادي رجالة وبنت واحدة، ومش هقدر أعملها قبل مجدي لو مجدي عملها ده هيساعدني لكن مش سهل عليا آخد القرار ده، وأحب أشوفه يتجوز الأول.
من ناحية أخرى، أكدت غادة عادل أنها شخصية محظوظة معظم الوقت، قائلة: أنا محظوظة والقدر بيلعب كل الأدوار مع كل البني آدمين لكني كده كده محظوظة.
