الفقير بيحس بالضعيف.. بائع مناديل يطعم قطة ورضيعتها الصغيرة
تداول مستخدمو مواقع التواصل الاجتماعي صورًا لرجل يطعم القطط من أكله، حيث تضمنت الصورة لقطة لـ بائع مناديل يجلس في الشارع وعلى رجله قطة ترضع ابنتها الصغيرة.
وكتبت علا محمد أبو السعادات، في منشور لها عبر فيس بوك: راجل بسيط بيبيع مناديل قابلته بالصدفة في الشارع.. لقيت قطة بترضع بنتها على رجله، ولما دردشت معاه شويه عرفت إن ده مكانه بتاع كل يوم، وأنه يقسم اللقمة مع مخلوقات ربنا الضعيفة.. القطة من حبها فيه بترضع ولادها على رجله.
ومن جانبها، قالت علا أبو السعادات، في حوارها لـ القاهرة 24، إنها لاحظت سلوك بائع المناديل والذي يبلغ الـ 50 من عمره، بأحد شوارع القاهرة، قائلة: لقيته قاعد جنب سور وعلى رجله قطة بيأكلها وهي بترضع بنتها، ولما قربت منه طبطبت على القطة لأني بعشق الحيوانات ولقيت إن القطة هادئة مستكينة.
وتابعت علا: اتكلمت معاه وعرفت إنه شغال بائع مناديل في شارع الحجاز، وشوية لقيته بيطلع جزء من أكله عيش وجبة ويأكل منه القطط وياكل منه هو كمان، ولقيت إن تصرف الراجل دا بيدل إن الفقير بيحس بالغلبان، والموقف ده بيتكرر كتير جدًا في الشارع المصري.
الرفق بالحيوان
وأضافت: في ناس فقراء كتير بيحنوا على القطط والكلاب في الشارع، وده بالرغم من بساطتها، وعلى العكس في ناس كتير برضو عندهم جهل بالرفق بالحيوان وعدم تحمل للمسئولية لكن ربنا يحفظنا، بسبب الراجل ده وأمثاله.. الفطرة السليمة بتقول إننا نرحم الأضعف وربنا خلق الكون مش علشان نعيش فيه لوحدنا.
وقالت: مهم جدَا إن يكون جوانا رحمة ووعي بأهمية الرفق بالحيوانات ومخلوقات ربنا الضعيفة.. أنا لما بشوف حد في الشارع بيعذب قط أو كلب بقف وأكلمه وأعرفه إن ده حرام، وده دورنا كمجتمع إننا نعلن عن رحمتنا بالحيوانات ونظهر النماذج اللي زي بائع المناديل.
