لوسي عن دورها في المداح 3: مش بكرر أدواري.. وتعبت في تجهيز الشخصية
تحدثت الفنانة لوسي، عن تفاصيل تحضيراتها لشخصيتها في مسلسل المداح 3، والذي تخوض من خلاله السباق الرمضاني 2023، ويُعرض عبر شاشة قناة MBC مصر.
وقالت لوسي، في تصريحات خاصة لـ القاهرة 24، عن تحضيرات شخصيتها في مسلسل المداح 3: تعبت في تجهيز الشخصية وساعدني المخرج أحمد سمير وأنا بعمل جنية مش بعمل بشر والبشر كلنا بنشبه بعض وقريبين من بعض وعالم الجن مختلف يعني في جنية شريرة وجنية كافرة وجنية مؤمنة، ورق السناريو كان كافي إني أعمل الدور وقرأت عن الموضوع عشان أفهم.
وتابعت لوسي، أنها لا تُحب تكرار الأدوار في أعمالها الفنية، موضحة: أنا مبعملش دور شبه التاني وعندي أقعد في البيت شوية لو فيه حاجة تشبه حاجة أو نفس الموضوع مبعملوش.
وسبق وأن تحدثت لوسي عن دورها في مسلسل المداح 3، في تصريحاتها قائلة: دوري في المداح الجزء الثالث يعتبر من أصعب الأدوار اللي هلعبها في حياتي لحد دلوقتي من أول ما بدأت التمثيل، وأنا مش ضمن الأرواح اللي هتظهر لـ الشيخ صابر، دوري شخصية غريبة شوية وهنسيبها مفاجأة للناس، وبدرس الشخصية كويس وهي واخدة كل وقتي تقريبًا.
المداح الجزء الثالث: أسطورة العشق
العمل من بطولة الفنان حمادة هلال، ويشارك فيه مجموعة من الفنانين أبرزهم: هبة مجدي، لوسي، رانيا فريد شوقي، أحمد كمال، سلمى أبو ضيف، محمد رياض، حنان سليمان، عفاف رشاد، خالد سرحان، وغيرهم من الفنانين، ومن المقرر عرضه في السباق الرمضاني المقبل 2023 على شاشة قناة MBC مصر.
