أبرز تصريحات محمود المهدي: زواجي من منة عرفة عقاب من ربنا وندمان أني سبت زوجتي الأولى
تحدث المنتج الفني محمود المهدي عن زيجاته الثلاثة ومن ضمنهم زواجه من الفنانة منة عرفة وسبب انفصالهما.
محمود المهدي يكشف عن تفاصيل زيجاته الثلاثة
وأعرب محمود المهدي عن ندمه الشديد لانفصاله عن زوجته الأولى وأم أبنائه بسبب خلافات بسيطة حدثت بينهما مثل أي زوجين، مشيرًا إلى أنه ما زال يحبها حتى الآن.
وأضاف محمود المهدي في لقاء تلفزيوني: أول جوازة وأنا 18 سنة حبيتها واترفضت تلات مرات من أهلها، حبنا كان قصة كبيرة، وحبينا بعض وإحنا في المدرسة ودخلنا جامعة مع بعض.
لسه بحب زوجتي الأولى وندمان أني سبتها
وتابع: أنا لسه بحبها جدًا لحد اللحظة دي، وهي أم عيالي، وبعترف أن دي الحاجة اللي ندمان أني سبتها وهفضل ندمان عليها طول عمري، وفي عشرة عمر بينا وأنا ندمان أني ما صبرتش على الخلافات اللي كانت بينا وحافظت على العيال لكني عملت زي الناس اللي بتعمل دلوقتي بتطلق بسبب خلافات بسيطة.
صعب تلاقي زوجة تصون شرفك
وأكمل المهدي موجهًا رسالة إلى طليقته الأولى وأم أبنائه: بقول لها أنا ما حستش بقيمتك غير بعد لما خسرتك، وبنصح الناس أن الخلافات العادية بين أي اتنين طبيعي نصبر عليها خاصة أنه صعب تلاقي حد يصونك ويصون شرفك في الوقت الحالي، وأنك تنزل سايب البيت تلاقي زوجتك عندها حدود في الشغل مع الناس ومفيش حاجة اسمها أصدقاء، وللأسف الحاجات دي ما بقتش موجودة.
كما أكد محمود المهدي احترامه الشديد لطليقته الثانية قائلًا: الزوجة التانية ليها احترامها وبحترم أهلها، وبتحبني واللي حصل بينا سوء فهم بيني وبينها لأنها كانت صغيرة وهي بتحبني واتجوزت واطلقت ولسه بتتواصل معايا وبكن لها كل الاحترام.
محمود المهدي يكشف سبب انفصاله عن منة عرفة
كما تحدث المهدي عن زواجه وانفصاله عن منة عرفة معربًا عن ندمه الشديد عن ارتباطه بها، إذ قال: زواجي من منة عرفة صدمة وممكن كان عقاب ليا في حاجات كتير أو ابتلاء من اللي عملته لأني ما صبرتش مع أم ولادي.
وعن قصة تعرفه على منة عرفة وارتباطهما قال: اتعرفت على منة عرفة خلال تصوير فيلم تلات ستات وكنت مرتبط بالزوجة التانية وهي كانت عارفة الزوجة التانية، وبعدها سبت زوجتي التانية وارتبطت بمنة، ما أقدرش أقول سبتها علشان منة ولكن لما تكون منفصل مع حد وحد يجي لك ويقول لك انت تستاهل أحسن من كده فبيأثر عليك.
منة عرفة خانتني عاطفيا واكتشفت صدفة
وعن سبب خلافاته مع منة عرفة قال: مشاكلي مع منة ابتدت لأني كنت رافض فكرة اللمس في التمثيل وأنا ضحيت بحاجات كتير واتظلمت واتسرعت وما كانش ينفع تكون معايا، وفي ناس كانت بتسخنها عليا وفهموها أني دمرت مستقبلها الفني.
وتابع: أنا صريح مش بعرف أنافق وأكتر حاجة بكرها الكدب، وطبيعي كنت متفق على حاجات ما حصلتش قلت لها اعملي فن هادف وأنا هدعمك وحاجات ما تسيئش ليا في الشغل، وأنا مش ضد الفن في حاجات محترمة وناس محترمة.
واتهم محمود المهدي منة عرفة بالخيانة إذ قال: منة عرفة خانتني عاطفيا واكتشفت صدفة، ودمرت حياتي لأن افلامي أتوقفت لما انا دافعت عنها، واللي قدمته ما توقعتش قصاده الي حصل منها.
