أنا وهي معمولنا عمل.. ننشر أقوال المتهم بإنهاء حياة ابنته بعد تعذيبها بالوراق | تحقيقات
كشفت التحقيقات في واقعة مقتل طفلة وتعذيبها علي يد والدها وزوجته الثانية بمنطقة الوراق التابعة لمحافظة الجيزة تفاصيل الواقعة من أقوال المتهم أمام رجال التحقيق.
أقوال المتهم بقتل ابنته في الوراق
وينشر القاهرة 24 التحقيقات في واقعة مقتل طفلة وتعذيبها علي يد والدها وزوجته الثانية، حيث جاءت أقوال المتهم بإنهاء حياة ابنته أمام رجال التحقيق كالآتي:
اللي حصل إن ولادنا وكانوا عايشين معانا وأنا قلت لمراتي إن مريم بنت مراتي الأولى هتعيش معانا وهي رحبت جدا بيها وكانت بتاخد بالها منها وبترعاها أحسن رعاية وتربية، بس أنا بصراحة ماكنتش طايق بنتي مريم ولا طايق أبص في وشها ودايما بضربها في الرايحة والجاية معرفش ليه بس أنا تقريبا معمولي عمل أنا وهي.
وأضاف المتهم أمام رجال التحقيق: لسعتها بالسيجارة كذا مرة الفترة اللي فاتت من أسبوع تقريبا عشان مش بتسمع الكلام ولسعتها مرة في دراعها الشمال ومرة في صدرها ولسعتها في مناطق حساسة وفي حتت تانية كتير وفي مرة مسكت سلك الشاحن بتاع الموبايل وفضلت أضرب فيها كتير على ضهرها عشان ماكنتش بتسمع الكلام خالص.
وقال المتهم أمام رجال التحقيق: دايما بقول لبنتي على الحاجة متعملهاش وبتروح تعملها زي مثلا إنها كانت بتعمل حمام على نفسها ومثلا أقولها متفتحيش باب الثلاجة عشان بيعمل ماس وممكن تتكهربي بس كانت بتروح تفتحه برده.
وأكمل المتهم أمام جهات التحقيق: امبارح كنت في الحمام وقلت لبنتي متفتحيش باب الثلاجة عشان لسه بنتي الثانية كيان متكهربة منه وبرده مسمعتش الكلام فطلعت من الحمام ومسكتها وفضلت أضرب فيها بالقلام وألطشها وفجأة وأنا بضربها لقيتها منزلة من بوقها حاجة زي رغاوي وريم كده ومن مناخيرها دم ومفيش فيها نفس.
وأضاف المتهم أمام جهات التحقيق: روحي انسحبت مني وروحت جريت بيها على الحمام أغسلها وشها وأقولها فوقي مالك وهي مفيش منها أي استجابة وعملتلها تنفس صناعي في بوقها بس مفيش فايدة، وفجأة لقيت نفسها اتقطع خالص وحطيت دماغي على صدرها ملقيتش فيه نبض خالص روحت قاعد على الأرض ومقدرتش أقف.
وأكمل المتهم أن مراته أخذتها فورا على مستشفى التحرير العام عشان تلحقها وتشوفها ولما وصلت حجزوها وقالوا إنها ماتت، وحجزوا مراتي في نقطة المستشفى لغاية لما أنا روحتلهم.
