عرف عليا واحدة تانية بعد 23 سنة زواج.. سيدة بالدقهلية تستغيث من زوجها: بيضربني ومش بيصرف عليا بعد ما بقيت عاجزة
مأساة حقيقية تعيشها سيدة مع ابنتها الوحيدة في منزلها بمركز طلخا في محافظة الدقهلية، وذلك بعد أن تركها زوجها بسبب مرضها ورفض أن ينفق عليها.
سيدة بالدقهلية تستغيث من زوجها
والتقى القاهرة 24، بالسيدة حنان وبدأت كلامها باكية: حياتنا اتدمرت بسبب واحدة خطفت جوزي.. أنا متجوزة من حوالي 24 سنة وخلفت بنتي الوحيدة (حنان) وكنت فاتحه محل بقالة علشان أساعد في مصاريف البيت ولكن فجأة أصبت بالسكر وجلطة متشعبة وبتر في قدمي فقدت الحركة تمامًا وبعد كدة جوزي بدأ يقف في المحل لظروف مرضي، وتفاجأت إن أحد الجيران بيكلمني وبيقول في سيدة بتقف باستمرار مع جوزك ولما سألته أنكر وقال أنا بساعدها لأن عندها أيتام.
وأضافت: تأكدت إن فيه علاقة ما بينهما ولما وجاهته تعدى عليا وضربني وحاول يفتح عليا الغاز أكتر من مرة لولا تدخل بنتي، ولما تواصلت مع أهلها هددوني ببنتي الوحيدة.
وتابعت: وعرفت إن كتبلها الشقة اللي عايشين فيها وهيطردوني منها وأنا مليش حد ومش عارفة أعمل ايه، أنا عاجزة ومليش أي مصدر دخل غير معاش.
واختتمت: زوجي رافض يصرف علينا حتى التموين بياخده ويدهالها، أنا مش عايزة حاجة غير الأمان ليا ولبنتي.
