نيللي كريم: فيه حرب إلكترونية دايما شغالة على السوشيال ميديا.. واتعلمت كتير من فاتن حمامة
كشفت الفنانة نيللي كريم عن كيفية تعاملها مع السوشيال ميديا، مؤكدة أن هناك حربًا إلكترونية أغلب الوقت، بجانب الحديث عن تأثرها بالفنانة فاتن حمامة.
وقالت نيللي كريم خلال لقائها مع الإعلامية إيناس سلامة الشواف في برنامجها "طريق ثالث"، على راديو إنرجي 92.1: السوشيال ميديا قاسية جدًا في أغلب الوقت، وفيه حرب إلكترونية شغالة دايما، وعشان كدا بكون حريصة في التعامل.
وواصلت نيللي كريم: أنا والسوشيال ميديا مش صحاب، وبحب أتكلم عن أعمالي فقط على السوشيال ميديا ومش برد على أي حد ولا بنشر صوري مع أولادي.
كما تطرقت نيللي كريم للحديث عن المواقف والأشخاص اللذين أثروا في حياتها، قائلة: فيه مواقف وأشخاص كتير أثروا عليا خصوصًا أن حياتي فيها تنوع كبير، وأنا بدأت من الفوازير وكانت حلم كبير وغيرت فيا، وبعدها اشتغلت مع الفنانة القديرة فاتن حمامة في مسلسل وجه القمر، واتعلمت منها كتير؛ لأنها إنسانة طبيعية ومثقفة وتحب الحياة، ولما تعاملت معاها بدأت أفهم طبيعة المجال الفني.
نيللي كريم: والدتي أثرت فيا.. وبحب أستمتع بكل لحظة في حياتي
وأضافت نيللي كريم: والدتي أثرت فيا بشكل كبير، لأنها دايما بتشوف أن المرأة لازم تكون قوية وشغلها مهم، وبردو أولادي أثروا عليا وبقيت أقلق عليهم وأعيش مشاكلهم.
وتحدثت نيللي كريم عن هوايتها بجانب التمثيل، قائلة: أنا بحب أستمتع بكل لحظة في حياتي، لأني بحب التمثيل، الموسيقي، الرسم، الرقص، وبحب أعمل أكتر من حاجة مش التمثيل بس، يعني بعرف أخيط وأعمل شغل يديوي.
