محمد سامي يكشف سر نجاح جعفر العمدة: محمد رمضان شريك نجاحي.. ونؤكد على الأخلاق وبر الوالدين
كشف المخرج محمد سامي سر نجاح مسلسله جعفر العمدة والكيمياء بينه وبين محمد رمضان، بجانب الحديث عن تصغير الفنانة لبنى ونس بالعمل وتشبيه العمل بـ مسلسل عائلة الحاج متولي.
وقال محمد سامي في تصريحات تليفزيونية: مسلسل جعفر العمدة فيه رسائل كتير وأفكار كتير لها علاقة بالتعامل والاحترام والأخلاق والانتماء الأسري، وأنا بحب أتكلم عن البر بالوالدين وأفكر الناس بالقيم دي في مسلسلاتي من زمان.
وواصل محمد سامي: كل الناس عارفة التوليفة الأقرب للجمهور والشارع، ولكن اللي بيوصلها ويعملها هو اللي ربنا بيفتحها عليه وبيديله بصيرة وتوفيق، ومش بشوف نفسي الأفضل ولكن أنا ربنا كرمني وأهلي راضين عني عشان كدا ربنا موفقني.
كما تطرق محمد سامي للحديث عن سر كتابة أعماله بنفسه، قائلا: أتمنى يكون فيه إسكربت حلو وأبذل مجهود كـ مخرج، ولكن طول ما عندي حاجة عايز أقدمها ولم يعرض عليا نص أفضل، يبقى هعمل الفكرة بتاعتي ليه لأ، ولما بشوف التجارب الأخيرة بتاعتي كانت الأنجح، وزمايلي أكيد أعمالهم حلوة ومحترمة، والأعمال الأنجح ليا كنت كاتبها، وأكيد أنا على طول ببحث عن سيناريو جيد، ولحد دلوقتي متعرضش عليا إسكريبت قريب للناس وللي عايز أقدمه.
أما عن الإيفهات والمواقف الكوميدية في جعفر العمدة، علق محمد سامي، قائلا: 80% من الإفيهات في الإسكربت وقبل المشهد بقعد مع الممثلين وبقرأ لهم المشهد الأول، وممكن حد يطلع منهم بـ إفيه لطيف بس مش بنبعد عن السيناريو.
سر الكيمياء بين محمد سامي ومحمد رمضان
كما كشف محمد سامي عن سر نجاحه الدائم مع محمد رمضان، قائلًا: أنا ومحمد رمضان شركاء نجاح وإخوات، وفيه بيننا ثقة واحترام وبنشتغل كـ شخص واحد وبنساعد بعض لأننا في مركب واحد وبننزل الصبح من البيت عايزين نسعد الجمهور، وتفكيرنا قريب من بعض.
وعلق محمد سامي على تشبيه مسلسل جعفر العمدة بـ مسلسل عائلة الحاج متولي، قائلًا: المسلسل بتاعي مش بيحكي عن 4 زوجات بس، وطبعًا نور الشريف أستاذ اتعلمت منه وتشبيه جعفر العمدة بـ عائلة الحاج متولي دا فوق راسي، ولكن مسلسلي بيحكي عن أب بيدور على ابنه، وكنت منتظر الناس تقول أنه شبه الحاج متولي ودا اتقال لما تم الإعلان عن المسلسل بس إنما لم يأخذ صدى لأن المسلسل مختلف، وأنا هقدم ليه فكرة اتعملت؟ مش من قلة المواضيع ولا الأفكار.
تصغير لبنى ونس
كما تطرق محمد سامي للحديث عن تصغير الفنانة لبنى ونس شكلًا في المسلسل، قائلًا: تصغير شكل لبنى ونس تم عن طريق تقنية قريبة من تقنيات هوليوود ودا بدأنا نفكر فيه قبل ما نصور المسلسل نفسه، ودي تقنية أول مرة تتعمل في الوطن العربي وفرحت لما الناس اتكلمت، ومكنتش عايز أصغرها بالمكياج؛ لأ أنا عايز أعيش المشاهد جوا الحالة والمسلسل.
وتحدث محمد سامي عن سبب كتابه اسمه أكثر من مرة على تتر جعفر العمدة، قائلا: اسمي على التتر 6 مرات، أنا المخرج وعامل القصة والسيناريو والحوار هكتب قصة أحمد نجيب مثلا؟ وأمي وأبويا بيفرحوا لو أطول أكتبه 10 مرات هعمل كدا.
