سفري لليونان غيّر فيّ وفيلم المغتصبون سببلي فزع.. أبرز تصريحات ليلى علوي في راديو إنرجي
حلت الفنانة ليلى علوي ضيفة على برنامج طريق تالت الذي تقدمه المذيعة إيناس الشواف على راديو إنرجي 92.1، كاشفةً العديد من الأسرار وكواليس عدد من أعمالها.
أبرز تصريحات ليلى علوي
- والدتي أكبر مؤثر في حياتي.. زمان كنت أفسر طريقتها غلط بعدين لقيتها كانت صح.. وبقيت أكرر حتى اللي كنت بنتقده فيّ.
- اتعودت أعيش بدون سوشيال ميديا.. ولما ظهرت دخلت فيها بحكم مهنتي لأنها بتفيدني في ردود فعل الناس ومحبتهم بتفرق جدًا بس المهم نكون وسط.. لا بنزل تفاصيلي اليومية ولا بتخفي خالص.
- فيلم المغتصبون أثر عليّ جدًا وسببلي فزع وكوابيس وكمان مسلسل التوأم لأنهم شخصيتان ومكنش وقتها في التكنولوجيا في التصوير.. خلصته ونمت 6 أيام شبه متواصلين.
- عندنا شخصيات تاريخية ملهمة كتير زي مثلًا أم المصريين ومواقفوها ومي زيادة بثقافتها وشخصيتها رغم صعوبة طفولتها وعلاقتها مع جبران خليل جبران.
- الفن عمومًا أثر فيّا.. وتحديدًا المبدعة سعاد حسني.. كل ما أشوف لها دور كنت بعشقها وأحس بطاقة إيجابية ولما استوعبت أكتر عجبتني تلقائيتها.
- كان فيه ناس عنيفة في معطياتها للمعلومة حتى لو بهدف تربوي بس العنف نتيجته عكسية دايمًا.. من نفوري منه اتعلمت مكنش كده.
- أكتر تجربة حياتية مؤثرة هي صعوبة الفراق في الموت.. بقت تأثر فيّا الفترة الأخيرة مجرد ما أسمع عنها لأي حد.. بيهونها الرضا والدعاء المستمر.
- بقيت أشوف إزاي أوصّل معلومة لابني خالد بشكل يناسبه هو.. وده غيرني وأكسبني خبرة.
- سفرية غيرت فيّ كانت لليونان وأنا 18 سنة.. كانت أول مرة أكل جمبري وسمك لأن في بيتنا كانوا ممنوعين بناءً على رغبة والدي.. السفرية دي حببتني في الجمبري وخلتني اكتشف إن عندي حساسية من السمك.
- اشتغلت كتير طوال مراحل عمري وقدمت رسائل كتير بس أهم رسالة أتمنى أسيبها هي قيمة التسامح اللي ميقدرش عليها إلا الشخص القوي بعقله وبقلبه.
