تعرضت لحادثتين أثروا على حركتي وامتنعت عن التدخين من أجل أولادي.. أبرز تصريحات أبو مع راديو إنرجي
تحدث المطرب أبو عن الحادثتين اللذان أثرّا به ومنعوه من الحركة، بالإضافة إلى رأيه في مواقع التواصل الاجتماعي، موضحًا أنه يهدف إلى تقديم رسائل لها معنى مفيد عبر أغنياته، وذلك خلال استضافته ببرنامج تلت التلاتة على راديو إنرجي 92.1، والذي تقدمه المذيعة إيناس الشواف.
أبرز تصريحات المطرب أبو
- مكنتش بحب السوشيال ميديا وبعدين حبيتها.. الهجوم اللي فيها كان بيأثر عليّا بس لقيت اللي بيعملوا كده ناس في قمة الضعف والوهن فبقيت بعمل بلوك وأكمل حياتي.
- احنا مخيرين فيما احنا مسيرين فيه.. الطريق التالت قصتنا كلنا.
- شخصية سيدنا عليّ سابت فيّا أثر من صغري هو أوتي الحكمة من باب واسع وكتاباته هتفرق مع أي حد يقرأها.
- وأنا صغير كنت بحب من كل شخص صفة.. تدين جدي.. طريقة تفكير عمي وهكذا.. وكان فيه أشخاص كنت ببقى مرعوب أكون زي حياتهم فتجنبت أخطائهم.
- من التجارب اللي فرقت كتير في شخصيتي حادثة قعدتني 6 شهور بلا حركة وبعد كام سنة حادثة تانية قعدتني 8 شهور.
- في الحادثتين عوضت عجز الحركة بالروحانيات فبقيت أكثر حكمة.. وحسيت بنعمة الصحة ومساعدة الناس.. ورجعت أركب موتوسيكل تاني عشان متعقدش من حاجة.
- هاشم وليالي هما اللي ربوني.. توصيل قيم لأولادك مش بيكون بالقول أنت لازم تعمل عشان يقلدوك.. وعشان ولادي وقفت التدخين وطباع كتير غيرتها.
- كان عندي مدرس الرياضيات له جملة "قول يا باسط تلقاها هاصت" أثرت فيّا جدًا إن طول ما بتستعين بربنا في أي حاجة هتلاقيها فتحت معاك.
- رسالة الغنا مباشرة وأسرع من باقي الفنون عشان كده احترفت الغنا وراعيت إن أي أغنية لازم يبقى فيها معنى ورسالة تعيش وتسيب أثر للناس.
- تأثرت بطريقة أبويا وأمي فيما يخص الصلة.. والوصل مع ربنا مش بس في العبادات لكن في كل اللحظات.. النجاح فضل من ربنا والمشاكل لحكمة بنتعلم منها.
