فيه ممثلين صدموني وفيلم الجراج حببني في التمثيل.. أبرز تصريحات محمد شاهين مع راديو إنرجي
حل الفنان محمد شاهين، ضيفًا على المذيعة إيناس الشواف في برنامج طريق تالت، على راديو إنرجي 92.1، متحدثًا عن كواليس أعماله وطفولته وبداية دخوله المجال الفني، بالإضافة إلى التطرق لبعض المحطات في مشواره الفني.
أبرز تصريحات محمد شاهين
- في ممثلين كنت بحبهم قبل ما اشتغل فلما قابلتهم كان تعاملهم جاف وصدمني، وقتها قررت إني مبقاش كده لما أكبر ولازم أعامل الكل كويس لأن جبر الخواطر عبادة.
- أنا كسول على السوشيال ميديا بس بتسليني وبتابع أخبار منها، وأهم حاجة إني بقدر أشتري بدون ما أنزل.. عيبها إني قبلها مكنتش بسمع شتيمتي.. دلوقتي بقرأها بعيني.
- من وأنا صغير بفكر في التمثيل بس أهلي دخلوني طريق إني اشتغل في بنك دخلته وبقيت أقولهم فكوا شوية وبعد شهر مقدرتش أكمل وقررت أدخل الطريق اللي بحبه.
- الابطال اللي أثروا فيّا سندباد وعلاء الدين.. الشخصيات التاريخية الكبيرة مش تطلعاتي أنا بحب ميكي وبطوط.
- المواقف الحياتية بتأثر في خبراتنا.. في سنة جاتلي مشكلة كبيرة في ضهري ومكنتش بعرف أمشي ولا أقف.. فاعتذرت عن فيلم كان كبير وزعلت جدًا.. بس بسببها اتعلمت الصبر والهدوء ومزعلش على حاجة مش نصيبي.
- أمي كانت ديمًا تقولي أقدر الوقت ومبقاش متسرع.. لما كبرت اتعلمت ده بالخبرة.. ومع الناس اتعلمت الصبر وإني مزعلش على حاجة مش نصيبي.
- أكتر سفرية أثرت عليّا هي أول مرة أسافر لوحدي وأنا في الجامعة لأني من المتفوقين فنيًا.. كانت في مركب لعدة بلاد خلتني منطلق معتمد على نفسي.
- زمان كنت بحكم على الناس.. مع الوقت اتغيرت وكل واحد حر أنا أنصح آه بس أحكم لا والأثر اللي أتمنى أسيبه هو ذكرى كويسة ليّا.
- تأثري بفيلم الجراج وشخصياته وأنا صغير هو اللي حببني في التمثيل وتقديمي لشخصية الجاسوس سالم في الزيبق أثر فيّا من كتر ما كرهته.
