كمال أبو رية: أنا تشبعت من التمثيل وبشتغل لأني مينفعش أقعد في البيت
تحدث الفنان كمال أبو رية، عن إمكانية تقديمه أدوارا صعيدية مرة أخرى، خاصة أنه قدم العديد من الأعمال الصعيدية خلال مسيرته الفنية، وآخرهم دوره في مسلسل عملة نادرة المشارك في الموسم الرمضاني الجاري.
وقال كمال أبو رية، في تصريح خاص لـ القاهرة 24: أنا تشبعت من التمثيل وبشتغل لأن مينفعش مشتغلش، وعدى عليا 35 سنة كنت محظوظ لأني عملت كل حاجة.
وتابع: أنا عملت سير ذاتية وكوميدي وتراجيدي وشخصيات صعبة ومركبة وشخصيات بسيطة ولطيفة، وممكن أعمل دور صعيدي تاني إيه المشكلة، ولازم أشتغل لأني مينفعش أقعد في البيت.
وأضاف أن الدراما حاليًا تُعاني من مشكلة كبيرة في السيناريو، قائلا: في أزمة كبيرة في السيناريوهات المقدمة، ممكن يكون في فكرة كويسة ومبتتعالجش كويس، وممكن يكون فكرة مش حلوة ونتطرق ليها أو مفيش محتوى، عندنا مشكلة كبيرة في الكتابة والمفروض إننا نبحث مش معقول مصر مفيش فيها كُتاب.. عندنا كتير كُتاب سيناريو وعندنا روايات وعندنا المجتمع المصري.
واستكمل: الفن اتعمل علشان يساهم في استقرار وإصلاح المجتمعات، وأي فكرة تساهم في ده تطرح ميبقاش كتابة لمجرد الكتابة، ومشاهد متعاقبة وناس بتتكلم كتير، مش أي كلام بيتصور وخلاص.
أبطال مسلسل عملة نادرة
ومسلسل عملة نادرة، بطولة نيللي كريم، جمال سليمان، جومانا مراد، أحمد عيد، كمال أبو ريه، رمزي العدل، فريدة سيف النصر، ندا موسى، محمد لطفي، على الطيب، مريم الخشت، نهى صالح، ومحمد فهيم، وهشام عاشور، ريم رؤوف، كريم عبد القوي، والعمل من تأليف مدحت العدل، وإخراج محمد العدل، وإنتاج جمال العدل.
