خالد يوسف: التبارك بالأولياء مش كفر.. والفلاح إيمانه أقوى من صاحب اللحية الطويلة
كشف المخرج خالد يوسف عن رأيه في فكرة الإيمان والتبارك بالأولياء خاصة بعدما سلط الضوء عليها في مسلسله الجديد سره الباتع.
وقال خالد يوسف خلال حواره مع القاهرة 24: مش شايف الأضرحة خروج عن الدين، إنما بعض السلفيين شايفين كدا، مع أن الأولياء جزء من تكويننا كـ مصريين وعمرها ما كانت فيها كفر ولا زندقة أو إيمان بدون الله.
وواصل خالد يوسف: اللي عايز يشوف التبارك بالأولياء في السكة دي براحته، إنما المصري إيمانه سلس وبسيط وعفوي وبيتبارك بالآئمة والأولياء لأنها بتريح روحه، إيه في الدين ضد دا؟
وأضاف خالد يوسف: أنا شخصيًا بعمل كدا وبحب الموالد جدا، وقدمت فكرة الأولياء في مسلسل سره الباتع بشكل بسيط من غير ما أقع في الخرافة والكرامات والتخيلات والجن، وعملتها بالأسلوب المصري الحقيقي لأن إيمان المصريين مفيهوش لعبكة ولا أسئلة كثيرة، وبيتبارك بالأولياء ولا يشرك بالله، والفلاح البسيط اللي بيصلي ويرجع يزرع أرضه حتى مش بيروح الجامع إيمانه أقوى عشرين ألف مرة من أصحاب اللحية الطويلة.
أبطال مسلسل سره الباتع
ويشارك المخرج خالد يوسف في الموسم الرمضاني 2023 بمسلسل سره الباتع، ويضم العمل مجموعة كبيرة من أبرز الفنانين ومنهم، أحمد فهمي، ريم مصطفى، أحمد السعدني، نجلاء بدر، عمرو عبد الجليل، صلاح عبد الله، هالة صدقي، أحمد عبد العزيز، منه فضالي، أحمد عبد العزيز، محمود قابيل، عايدة رياض، خالد سرحان.
