مي كساب: مش بحب حد يتجرأ على جوزي لأني مش بتجرأ على أجواز حد
قالت الفنانة مي كساب إنها أصحبت أهدأ كثيرًا عن السابق، مشيرة إلى أنها ليس لديها عداءات في الوسط الفني.
وأضافت مي كساب خلال لقاء تليفزيوني: بقيت هادية في الشغل وعاملة زي حمامة سلام في اللوكيشن، والحمد لله طول عمري مش بعمل مشاكل في الشغل، وكنت عصبية ودمي حامي بس في الحق، وهديت خالص من عند ربنا وهي مهدئات رباني غالبًا جوزي دعا عليا.
وتابعت: ما عنديش عداءات مع حد في الوسط مرة مرة شديت مع مجدي الهواري، وكنت صغيرة واتصالحنا واتعلمت ساعتها إني لما أدخل شغل ما أزعلش مع حد فيه أو أعمل مشكلة لأن الوسط سمعة وسيرة واللي بيعمل مشاكل بيتعرف إنه بتاع مشاكل، ولو شايفة إن فه شخص مش بيحبني ببص له بضحك وكأني مش واخدة بالي لأني ما عنديش وقت ولا مشاعر أضيعها في حاجات زي دي.
مي كساب تكشف حقيقة تعديها بالضرب على مدير إنتاج
وردت مي كساب عن حقيقة تعديها بالضرب على مدير إنتاج عام 2015، قائلة: كنت في مسلسل المطلقات وحصل شد والولد كلمني بطريقة مش مهذبة وكنت لسه مكتوب كتابي على أوكا وكان بيمشي معايا طقم مكون من 6 بودي جاردات ومانعني أروح حتة لوحدي والولد شوحلي فالموضوع قلب خناقة بينه وبين الرجالة وهو زعل ونزل وعمل مشكلة وتواصلت مع والده لأني لا يمكن أعمل مشكلة مع ولد صغير ولا يمكن أستقوى على حد.
وأردفت: طقم البودي جاردات قل لكن مش بيخليني أسوق من عشر سنين ومانعني أروح مكان لوحدي.
مش بحب حد يتجرأ على جوزي
واستكملت: أوكا مش من الشخصيات اللي بتخنق لكنه بيحب الحرية، وأنا جالي وقت كنت غيورة جدًا وهديت عن الأول لأني كنت غيورة ومش سلسلة ومش عدم ثقة فيه لأني واثقة فيه لكن مش واثقة في الأطراف تانية ومش بحب حد يتجرأ على جوزي لأني مش بتجرأ على أجواز حد وعندي حدود مع الزملاء، والبنات بقت جريئة ما شاء الله وهما اللي بيعاكسوا الولاد دلوقتي ولحد دلوقتي بيقولوا لي أوكا عسل سيبهولنا والكراش بتاعي وبقيت أضحك في الأول كنت نار لحد ما هديت.
