خالد يوسف: لو قدمت حين ميسرة حاليًا هيُقام عليا الحد.. وممكن أعيد مشهد غادة عبد الرازق وسمية الخشاب
كشف المخرج خالد يوسف إمكانية إعادة تقديم فيلم حين ميسرة، مؤكدًا أن ذلك يعتمد على المزاج النفسي للجمهور، بجانب حديثه عن المشهد الشهير بين غادة عبد الرازق وسمية الخشاب في الفيلم.
وقال خالد يوسف خلال حواره مع القاهرة 24: لو قدمت حين ميسرة تاني دلوقتي هيُقام عليا الحد، ولكن ممكن أعمل مشهد زي غادة عبد الرازق وسمية الخشاب في الفيلم، إذا كان مفيدًا للدراما؛ لأني مبيفرقش معايا الهجوم.
وأضاف خالد يوسف: حين ميسرة نجح نجاحًا هائلًا وقت طرحه، ولو عملته دلوقتي ممكن يسقط؛ لأن فيلم عظيم زي باب الحديد وفيلم الأرض نجح قصادهم أفلام ضعيفة، ودول سقطوا بسبب المزاج النفسي للناس في الوقت ده، ودي حاجة مفيش صانع سينما يقدر يحددها.
أما عن إمكانية إعادة تقديمه لمشهد حين ميسرة الشهير بين غادة عبد الرازق وسمية الخشاب، علق خالد يوسف قائلًا: أنا مش هيفرق معايا حد؛ لأن اللي اتعمل ضدي متعملش ضد حد في العالم، وبططوا بيا الأرض ومبخافش من الهجوم وهعبر عن نفسي بالشكل اللي عايزه.
آخر أعمال خالد يوسف
وعلى جانب آخر، حقق خالد يوسف نجاحًا هائلًا بمسلسله الجديد سره الباتع، والذي يُعرض طوال شهر رمضان على شاشة ON ومنصة واتش إت، وضم العمل عددًا كبيرًا من الفنانين، أبرزهم أحمد فهمي، أحمد السعدني، حنان مطاوع، حسين فهمي، أحمد عبد العزيز، هالة صدقي.
