رضوى الشربيني تكشف مواصفات زوجها المستقبلي: راجل قادر ومقدرش أتجوز واحد دمه تقيل ومش ناجح
كشفت الإعلامية رضوى الشربينيعن المواصفات التي تتمناها في حال أقدمت على خطوة الزواج مرة أخرى، بعدما انفصلت منذ فترة طويلة عن والد ابنتيها تيا وتمارا.
وقالت رضوى الشربيني في تصريحات تليفزيونية عن المواصفات التي تتمناها في زوجها المستقبلي: عايزة الراجل يكون قادر علشان أنا ست قادرة، وعلشان العفو عند المقدرة، وكل ما هيكون راجل قادر كل ما مش هيبص على أخطائي وعلى الثغرات في الحاجات اللي بعملها وهيكبر دماغه، ومش هيبص على عيوبي.
وتابعت رضوى الشربيني: يكون راجل قوي ويقويني ويبقى ضهري وسندي، ويتكلم معايا في البرنامج والحياة، ويستعمل قوته معايا مش عليا، ولو قرر إنه مش عايز رضوى الشربيني مش هيعمل حاجة تجرح رضوى الشربيني غير إنه هيتواجه معاها ويقول أنا آسف مش قادر أكمل.
وأضافت رضوى الشربيني: لازم يكون ناجح ومقدرش أتجوز راجل مش ناجح ولا أنا أنجح منه، ولازم يكون عنده طموح ويتقي ربنا في معاملة البني آدمين وأنا مش أولهم، والدته ووالده، ولازم يكون بيحبني أوي ويهتم بيا أوي ويعرف يتعامل معايا لأني صعبة أوي.
واختتمت رضوى الشربيني حديثها: يكون حنين وطيب ودمه خفيف ومقدرش أتجوز راجل دمه مش خفيف أبدًا، ولازم يبقى شيك في نفسه وخفيف كده، وخير اللهم اجعله خير صحيت من النوم.
رضوى الشربيني تكشف تفاصيل وفاة والدتها
كما تطرقت الإعلامية رضوى الشربيني في حديثها إلى تفاصيل وفاة والدتها، موضحة أن الأمر حدث وقت انتشار وباء كورونا، وحكت بطريقة مؤثرة أن المنزل بالكامل أصيب بكورونا، فقالت لها والدتها: لو دخلتيني المستشفى أنا هاموت، هونت عليها وقلت لها إنه بس 48 ساعة هنظبط فيها الأكسجين، وبعد 12 يوم مرت وهي أصعب أيام في حياتي، وكان الدكتور بيبعت لي حد يديني حقنة عشان أقدر أشوف البيت وأعمل تحليل لكل الناس اللي في البيت وأروح لوالدتي وأتخانق مع الدكتور.
وأضافت رضوى الشربيني: كنت بحمد ربنا إني كورونا إيجابي عشان أقدر أشوفها لغاية اليوم اللي على غير العادة الدكتور كلمني وقالي تعالي شوفي مامتك عشان تتحسن وتبقى أحسن فتعالي شوفيها، فروحت على طول، فاقت وبعدين بصت لي، وقالت لنا أنا وأخويا خلي بالكم على بعض، وبعدين كل الأجهزة وقفت، وكل الأرقام عمالة تقع، ولما سألنا الدكتور إيه اللي بيحصل قالنا ده الطبيعي وخرجنا بره.
وتابعت: يوم الوفاة أنا كنت رايحة لها في الطريق وكأني مستمعتش كلام الدكتور لقيت المساعدة بتاعته بتكلمني قبل ما أوصل بدقايق بسيطة بتبلغني إن والدتي اتوفت.
ووجهت رضوى الشربيني رسالة لوالدتها في نهاية حديثها قائلة: كنتي دايما بتقولي لي إن بكرا لما أموت هتقولي ولا يوم من أيامك يا أمي، فلو إنتي سامعاني دلوقتي... أنا بقولها كل ثانية.
