تامر حبيب: نسيت ذكرى وفاة أمي السنة دي ومحستش بتأنيب ضمير.. وبقولها إني رجعت انتظم في الصلاة
تحدث السيناريست تامر حبيب عن علاقته بوالدته الراحلة، التي تركت أثرا كبيرا في حياته كما وصف، كما روى يوم وفاتها، وكيف يعيش الآن بدونها.
وقال تامر حبيب في تصريحات تليفزيونية: لسه مستوعبتش رحيل أمي، عارف إنها مشيت بس لغاية دلوقتي بتيجي لحظات أتعامل إنها موجودة وأقول أنا هجيب كذا لماما عشان بتحبه، بس أرجع أفتكر إنها مش موجودة، وحصلت حاجة غريبة إني أول مرة أنسى ذكرى وفاة أمي السنة، وهي السنة الخامسة، ومحستش بتأنيب ضمير عشان خلاص لازم الحياة تمشي، أنا مؤمن إن هي مشيت فعلا، بس لازم أطبق إيماني ده في الواقع وأتأقلم.
وتابع: أنا برج السرطان، وده برج عموما بيبقى متعلق بأمه جدا، بس أنا عمري ما كان عندي الصفات اللي بتكون في الولد الوحيد، زي إني مش أناني ومش اعتمادي على الناس، وده حتى بطبيعة شغلي إني أنا القائم على العمل، وهي كمان مكنتش أم أنانية.
وأضاف تامر حبيب: جملة اللي من غير أم حاله يغم دي بحسها بيني وبين نفسي ساعات، بس الحمد لله حالي في الدنيا عموما حلو وكان خيالي إني اليوم اللي هفقد فيه أمي أنا كمان هروح، بس اكتشفت إن ربنا زي ما بيدي الإنسان الابتلاء بيدي كمان قوة تخليك تكمل، ومكنتش متخيل إني هقدر أدفن وأعمل كل ده.
وروى تامر حبيب يوم وفاة والدته، وقال: أمي لما توفيت كنت في لبنان ودايما لما بسافر تقولي لما توصل كلمني طمني ودايما بنسى أطمنها، ويومها نسيت أكلمها أطمنها وكنت معزوم في مكان حلو أوي والجو حلو أوي، ولما قولتلها كدة قالتلي يا رب من بيت حلو لبيت أحلى ومن جنينة حلوة لجنينة أحلى ومن جو حلو لجو أحلى، بس بعدها اكتشفت إنها كانت بتدعي لنفسها وراحت لبيت أحلى لما توفيت.
رسالة تامر حبيب لوالدته في رمضان
واختتم تامر حبيب حديثه، موجها رسالة لوالدته في شهر رمضان، وقال: عايز أوجه لها رسالة في رمضان، إني رجعت أصلي أول رمضان، لأني مكنتش بصلي بس بقيت منتظم في الصلاة جدا وبالصدفة إن صورتها في اتجاه القبلة فـ بحس إننا بنصلي سوا.
