تامر حبيب: الجواز مؤسسة اجتماعية فاشلة والست أهم من الراجل ألف مرة
كشف السيناريست تامر حبيب عن آرائه الشخصية حول الزواج وسبب رفضه للزواج، والمساواة بين الرجل والمرأة، الذي أكد مناصرته لحقوق المرأة.
وقال تامر حبيب في تصريحات تليفزيونية: أنا شايف الست أهم ألف مرة من الراجل لأنها هي اللي بتعمل الراجل وكلنا اللي عملتنا أمهاتنا وكل راجل طلع عامل أزاي هو صورة عن تربية أمه.
وعن رفضه فكرة الزواج، علق تامر حبيب أنها مؤسسة فاشلة، مضيفًا: أنا شايف الجواز مؤسسة اجتماعية فاشلة ولو جه نصيبي في الجواز زي القطر هتجوز مجاش خلاص.. وعندي ناس أعرفهم عندهم موضوع المساكنة ولكن دفن الرأس بتاعتنا زي النعام مليش دعوة به.
وتابع: جزء من مهنتنا نقف في وش المدفع ونتكلم على المسكوت عنه ودي نماذج في حياتنا ولو قعدت أعمل حساب للهجوم على السوشيال ميديا مش هعيش حياتي وطظ في الناس دي.
تامر حبيب: معنديش حاجة اتكسف منها
كما علق السيناريست تامر حبيب على تصريحات المخرجة إيناس الدغيدي الأخيرة بشأن ميوله المختلفة واتهامه بالمثلية الجنسية، قائلًا: إيناس الدغيدي، بحبها جدًا على المستوى الفني والشخصي، هي صديقتي، والتصريحات اللي قالتها حصل لعب في المونتاج.
وأضاف تامر حبيب: أنا معنديش حاجة اتكسف منها أنا متأكد إن تصريحاتها كانت رد على كلام اتقال خلال الندوة، لكن ده مش رأيها الشخصي، وطلع كلام إني خدت موقف عدائي من إيناس بعد التصريحات دي ولكن بالعكس اتقابلنا بعدها واتكلمنا وشرحت لي هي قالت كده ليه.
