محمد محمود عبد العزيز: الناس بتطلع إبراهيم عيسى على المسرح عشان بعض أعماله.. ومقلقتش من التعاون معاه
تحدث الفنان محمد محمود عبد العزيز، عن الهجوم الدائم على الكاتب إبراهيم عيسى، خصوصا قبل عرض مسلسل حضرة العمدة، الذي لاقى انتقادات عدة، بسبب تخيل البعض أنه سيخبط في الدين والإسلام.
وقال محمد محمود عبد العزيز خلال ندوته في القاهرة 24: مفيش حد هتكون بتقبله أو بترفضه طول الوقت، وأي حد في الدنيا هتكون معارضه طول الوقت لازم هتصادف وتكون معاه في عمل معين، وإبراهيم عيسى اتكلم في مليون موضوع بس الناس مصرة تمسك في كام موضوع هو اتكلم فيهم ويطلعوه بيهم على المسرح.
وأردف قائلا: ممكن يكون إبراهيم عيسى عنده جرأة معينة تخصه هو في وجهة نظره، بس أنت مش لازم تاخد بيها، واختلافي أو اتفاقي معاه لا هيزوده ولا هينقصه.
وتطرق للحديث عن دوره في مسلسل حضرة العمدة، كاشفا أنه لم يقلق من المشاركة في عمل من تأليف إبراهيم عيسى، حيث قال: مقلقتش من المشاركة في عمل من تأليف إبراهيم عيسى، لأن أنا المفروض أخاف أو أقلق من الممثل اللي هشتغل معاه، أنا عارف أنا هقدم إيه، والناس كلها قالت إبراهيم عيسى هيخبط في الدين والإسلام بس طلع مفيش تخبيط خالص، هو فيه نموذج سيئ لشخص بيتمسح في الدين ومدعي التدين، وبدأ يترد عليه بظهور الشيخ الوسطي الأزهري اللي مسك الجامع، إذا إحنا قدمنا النموذجين من الشيوخ.
مسلسل حضرة العمدة
على جانب آخر، يشارك في بطولة مسلسل حضرة العمدة عدد من الفنانين، إلى جانب الفنانة روبي، وهم: محمد محمود عبد العزيز، بسمة، إدوارد، دينا، وفاء عامر، حسام داغر، وآخرون، ومن إخراج عادل أديب.
