أحمد فهمي عن سره الباتع: مكنتش متوقع أغير جلدي خلال رمضان.. ومليش في جو الأولياء
تحدث الفنان أحمد فهمي عن دور حامد الذي جسده في مسلسل سره الباتع، والذي يعرض في موسم رمضان الحالي، كما كشف كواليس اختياره لهذا الدور، خاصة أنه غير من جلده الفني.
وقال أحمد فهمي خلال ندوته في القاهرة 24: تجربة دور حامد مغامرة مختلفة، ومكنتش متوقع إني أغير جلدي في رمضان؛ لأني كنت مقرر إني هنوع بين الكوميدي واللي مش كوميدي في الأفلام بس، لكن في رمضان البيع والإعلانات بتيجي على أساس المضمون.
وأضاف: ومعروف إن فهمي بيعمل كوميدي، وبيجيب فيه إعلانات وكله تمام، فكانت مفاجأة بالنسبالي لما اتعرض عليا شخصية حامد، بس حبيت أخوض التجربة واتبسطت بيها جدا.
وكشف فهمي كواليس عرض دور حامد عليه، قائلًا: أنا في الأول كنت ماضي مسلسل تاني كوميدي، وكلمني حسام شوقي قالي في مسلسل مع المخرج خالد يوسف، وكان ساعتها اسمه سر السلطان، وكنت ساعتها بحضر لمسلسلي الجديد الكوميدي، بس لما قعدت مع أستاذ خالد وحكالي المسلسل، قولتله تمام بس من باب الأدب محتاج أقعد مع الناس اللي أنا متفق معاهم أشوف ينفع أسيب المسلسل ولا لا، والناس تفهمت الموضوع ومخدوش العربون حتى، فمضيت سره الباتع.
ثم تطرق أحمد فهمي للحديث عن قصة مسلسل سره الباتع، وحديثه مع المخرج خالد يوسف بالبداية، معقبًا: المسلسل سياسي بيناقش القضايا المصرية، وكانت أكتر حاجة اتكلم أستاذ خالد معايا فيها إن النوعية دي محتاجة تبقى مسلية عشان ميبقاش مسلسل تعليمي، لأن الأعمال اللي بتبقى كلها معلومات غصب عن فريق العمل هتقع، والناس مش هتهتم بيها أوي، وهو قدر يخلي المسلسل مسلي برغم إنه ملئ بالمعلومات.
شخصية حامد في مسلسل سره الباتع
واختتم أحمد فهمي حديثه، مؤكدًا أن شخصية حامد لا تشبه شخصيته الحقيقية في شيء، مضيفًا: شخصية حامد مش شبهي خالص لأني مليش في أجواء الأولياء، ومروحتش للسكة دي قبل كدة، وحتى شكله ولبسه مش شبهي.
