مديحة البكري: محمد سامي كان ماشي بالكانيولا خلال تصوير جعفر العمدة.. وكان بياخد محلول ويقوم يكمل
تحدثت الفنانة مديحة البكري عن كواليس تصوير مسلسل جعفر العمدة بطولة الفنان محمد رمضان والمخرج محمد سامي.
وقالت مديحة البكري، خلال لقاء مع القاهرة 24: محمد سامي كان بيجمعنا وأول مشهد جمعنا وعرفنا على بعض.
وأضافت: محمد سامي على قد طييبته على قد ما هو عصبي، وكان ماشي بالكانيولا ويدخل غرفته ياخد محلول ويطلع علشان يعرف يكمل والكانيولا في إيده على طول، علشان كده إحنا كنا راحمينه وما حدش بيعترض والمفروض المخرج ما حدش يعترض على كلامه ده الليدر وأكيد هو عاوز ينجح.
وعن أكثر موقف انفعل فيه محمد سامي، قالت: خلال تصوير مشهد فرح شوقي ووداد لأن المشهد اتعاد كتير بسبب إن العروسية وهي ماشية في ناس في المجاميع طلعوا كاميرات وصوروا ومحمد سامي نبه إن المجاميع يعني زي الممثلين.
وأضافت مديحة البكري عن تعاونها مع المخرج محمد سامي: مخرج جميل، ونعرف بعض من زمان واشتغلت معاه أكتر من عمل، وراهن عليا في الدور ده وقالي هتعمليه على الرغم من إني ما أقدمتش أدوار شر قبل كده، ولكن أنا كنت خايفة مقدرش أعمل الدور.
وتابعت: كنت خايفة وكارهة دوري في المسلسل، مش علشان هلبس حجاب ولكن علشان هنزل الشارع باللبس ده وهتكلم بأسلوب مش أسلوبي، ولكن كان فيه توجيهات كتيرة من محمد سامي علشان يطلع بالشكل ده.
وتجسد مديحة البكري في مسلسل جعفر العمدة دور شريفة وهي أم شوقي حماة جعفر العمدة وهي شخصية حاقدة.
