ماجد المصري: عندي أقساط وبتخانق على غلاء الأسعار.. ومشكلتنا بناخد الأجور على دفعات
قال النجم ماجد المصري إن الفنان لديه مسوؤليات وأقساط مثل أي مواطن، مشيرًا إلي أنه يعاني أيضًا من الغلاء الأسعار.
وأضاف ماجد المصري في حواره لـ القاهرة 24: كلنا عايشين زي بعض، اللي معاه 10 قروش بيقدر ياكل ويشبع وينام وعنده راحة البال والـ 24 قيراط بتوعه، وفيه غيره فنان معاه فلوس وواخد الـ 24 قيراط، وأهم حاجة الرضا، وأنا عندي أقساط وبتخانق على غلاء الأسعار زي أي راجل، وكله بيشتكي وكله تعبان ومستغرب.
وتابع ماجد المصري: الموضوع متعب جدًا ولازم كل فنان يكون له مشروع بجانب الفن، ومشكلتنا إن الأجور بتاعتنا بناخدها على دفعات، وبنصرف الدفعة ونصرف اللي بعتها ومش بناخد فلوس كاملة على بعض وفيه التزمات أنا راجل مسئول عندي مدارس وكل حاجة، وفي الآخر كلنا بنوصل الفلوس لبهض أنا باخد مرتبي وبدي للسواق والبنزينة وبطلع صدقة وزكاة وبنوصل لبعض وهكذا، وعندي حاجة بجانب الفن بس عائدها مش كبير.
وعلى جانب آخر، تحدث ماجد المصري عن كواليس تعاونه مع ياسمين عبد العزيز في مسلسل ضرب نار، حيث أوضح: ياسمين نجمة كبيرة وعشرة عمري وأختي وحبيبتي من زمان، وأخرجت لها إعلانات زمان، وياسمين عبد العزيز شاطرة أوي ومثابرة ومركزة وصنعت اسمها في الصفوف الأولى ودي أول مرة نشتغل مع بعض وكنت بسأل عليها في مرضها، ولكن دي أول مرة في عمل فني وهي زي ما هي قلبها أبيض وبنت بلد بتحب شغلها.
