سائق توك توك متهم بالتهرب الضريبي: روحت البريد لقيت عليا ديون بـ 244 مليون جنيه
كشفت التحقيقات في قضية اتهام سائق بمنطقة البساتين يدعى حسن.ع 54 سنة يعمل سائق توك توك، بالتهرب الضريبي بمبلغ يصل لـ 244 مليون جنيه إثر كونه شريكا في شركة للدعاية والإعلان.
تفاصيل اتهام سائق بالتهرب الضريبي
وقال حسن.ع أمام جهات التحقيق: اللي حصل أن انا كنت ساكن في شقة وبعد وفاة والدتي صاحب الشقة أخدها علشان كانت إيجار.
وأكمل حسن.ع أمام جهات التحقيق: وبعد كده يوم 21 /2/2021 كان في حد جه من مكتب بريد المعادي على العنوان القديم، وأخويا قابله علشان ساكن جنب بيتى اللي فيه عنواني القديم، وسلمه جواب من الضرائب، مفاده أني لازم اروح بنفسي استلم جواب الضرائب من مكتب بريد المعادي وروحت دخلت مكتب مدير بريد العادي، وأداني جواب جاي من مصلحة الضرائب المصرية وطلبت يفتح الجواب ويقرلأ علشان مش بعرف أقرأ، وفتح الجواب وطلع منه خمس إخطارات من مصلحة الضرائب لأني مديون المصلحة الضرائب 244000000 مئتا واربعة وأربعون مليون جنيه.
تهرب ضريبي
وأضاف الشاكي: أنا انصدمت وقولتله أنا معرفش حاجة عن الكلام ده، وقالي روح الضرائب أسأل، وروحت مصلحة ضرائب العباسية وقابلت مدير المنصورية الضرائب بالعباسية، واكتشفت أنى عليا ضرائب بمبلغ 244000000، علشان أنا شريك في شرکة تضامن ومعايا شركاء تانين، ولقيت نفسي مطالب بسداد الضرائب دي علشان أنا شريك متضامن فيها.
وأردف حسن.ع: أنا قولته أنا معرفش حاجة عن الموضوع ده وبعدين مدير المصلحة جابلي الموظف المسؤول عن الموضوع، وقالي أني ممكن الموضوع ده كله معمول من غير علمك، وقالي ممكن يكون التوكيل اتعمل لمحامي والمحامي استخدم التوكيل وقدمه للضرائب وأدانى صور ضوئية من عام التأسيس الشركة، وبعد كده أنا روحت عملت محضر في القسم.
