محمد محمود عبد العزيز: كريم أخويا ممثل لم يُكتشف حتى الآن
تحدث الفنان محمد محمود عبد العزيز، عن شقيقه الفنان كريم محمود عبد العزيز، وكشف كواليس تقمصه للشخصية التي جسدها في فيلم موسى.
وقال محمد محمود عبد العزيز، خلال ندوته في القاهرة 24: كريم ممثل لم يُكتشف حتى الآن، وكل عمل بيفاجئ الناس بجزء جديد في شخصيته.
وتابع: فيلم موسى بالنسبة لي مهم جدا، وقدم حالة نفسية صعبة ورسالة مهمة، ومقدرش أتفرج عليه أكتر من مرة، وأنا عارف كريم تعب فيه قد إيه؛ لأننا كنا مقيمين في بيت واحد.
وأضاف: كريم فضل متقمص ومتوحد مع الشخصية وقاعد لوحده وبياكل لوحده، وقلتله أنت لبست الشخصية وهتاخد وقت عشان تطلع منها، ودي حاجة كنا بننتقد أبونا فيها وفي الآخر لبسناها إحنا الاتنين وبقينا بندخل قوي جوا الشخصيات.
نصيحة محمود عبد العزيز لأولاده
وكان كشف محمد محمود عبد العزيز، نصيحة والده له هو وكريم، خلال ندوته في القاهرة 24 قائلا: أبويا نصحني أنا وكريم إننا منمثلش، وبدأنا نفهم مؤخرا سبب كلامه؛ لأن الشغلانة صعبة جدا، أنت ممكن تشتغل النهاردة وبكرة ولمدة سنين لا.
وأضاف: ممكن فنان يقعد في البيت بإشاعة واحدة تطلع عليه، أيا كان حجم نجوميتك، زي إن حد يقول عليك إن الممثل ده مش بيحفظ ويذاكر، أو بيضرب أوردرات، وبدأت أستوعب ده لما بدأت أدخل في المجال أكتر.
