هالة صدقي: بعتبر نجاحي في مسلسل جعفر العمدة لبنات جيلي.. ومحمد سامي السبب
كشفت الفنانة هالة صدقي تفاصيل مشاركتها في مسلسل جعفر العمدة، بطولة الفنان محمد رمضان، كما تحدثت عن كواليس العمل مع المخرج محمد سامي.
وقالت هالة صدقي، خلال لقائها مع برنامج معكم للإعلامية منى الشاذلي: طبعًا نجاح مسلسل جعفر العمدة غير عادي، أنا مخضوضة مع إني مخرجتش وسط الناس، بس ردود الفعل على السوشيال ميديا كبيرة، وكنت في الإمارات وأنا فرحانة بس مش فرحانة لأني ست كئيبة بطبعي، انتي هتعملي إيه بعد كده، روحنا إيفينت المجموعة كلها بعد 4 أو 5 حلقة، وجالي مكالمتين مهمين جدًا، من ناس متخصصين جدًا، وكم الكلام الحلو اللي جه قلقني.
وتابعت هالة صدقي قائلة: فيه كاتب مهم جدًا قالي معرفتش أكتب إيه بسبب انبهاري بالدور، وبعد ما قفل عيطت في نص الحفلة، وأكيد النجاح ده بسبب محمد سامي، هو كلمني كنا في الصيف، قالي هالة عمال أفكر في شخصية كده ومش شايف حد غيرك إنتي، دلوقتي بسألك هي الدور أم لولدين كبار منهم محمد رمضان وقولتله معنديش مشكلة علشان لعبت دور أم محمد رمضان قبل كده، بس عندي قلق من الشخصية التانية، وبردو معنديش مشكلة وممكن نعمل ده بالميك أب أو الإضاءة، والإضاءة لعبت دور عظيم جدًا إن أبقى ست كبيرة وبملامح حلوة، وعملنا حاجات كتير بردو بالميك أب، وهو مش ميك أب تعجيز، إحنا أكدنا على التعجيز، فقولتله معنديش مشكلة لأن الهدف شايفه محمد سامي من بعيد، وعايز أعرف ليه الممثلين بيبقوا في أحسن حالاتهم مع محمد سامي، وكان لغز بالنسبالي.
وأردفت هالة صدقي: قولت لمحمد سامي موافقة والدور مجرد فكرة، والدور مكنش كبير، وكنت حاسه إنه الدور اللي أنا عايزاه، المكتوب على الورق حاجه والدور حاجه تاني، وقالي هتثقي فيا ولا لا؟، ثقي فيا، أكيد لما أجيب هالة صدقي مش هضحى بتاريخها وهستفاد بيه، وهو عنده بُعد نظر غير عادي، وبيقولي مش عارفه صفصف هتعمل إيه في الناس، أنا عارفه إن إحنا هننجح، لكن بالشكل ده الوحيد اللي كان شايف محمد سامي، الإفيهات أغلبها هو اللي كاتبها، عندي مشهد صفصف تقف في الشرفة كثيرة جدًا، قولتله الشرفة بطلة المسلسل، شوفي التصوير اللي هو بيعمله والأداء اللي بيدهولي، وطبعًا علشان مش متعودة ده بياخد من أكتر زاوية وبيعيد المشهد، وبستغل وجودي وبشكره من كل قلبي إنه قدر وزاح قشرة كانت موجودة واتشالت، وظهرت هالة صدقي تاني.
هالة صدقي: كل الأدوار اللي هتجيلي هتكون زي دور صفصف
واختتمت هالة صدقي: أنا بعتبر إن نجاحي في المسلسل ده هو نجاح لبنات جيلي كله، هما دلوقتي محدش مهتم بينا، وبيحاول ينزلونا درجة ثانية وميستغلوش خبراتنا وبيستسهلوا، وكل الأدوار اللي هتجيلي بعد كده هتكون زي دور صفصف، ولما عملت أرابيسك، جالي الأدوار باسم الشخصية، أنا من حبي وخوفي على شخصية رفضت الأدوار، وقفلت على السكة ديه خالص، وبعدت أوي عن الشعبي.
