يسافر من أسوان للجيزة بصحبة رشيدة لبيع المشغولات اليدوية.. بكار الزمالك: طردوني من مصدر رزقي
من أسوان وحتى محافظة الجيزة، تحديدًا بمنطقة الزمالك، مسافة قطعاها إبراهيم صاحب الـ 28 عامًا، مرتديًا الملابس الأسوانية، بصحبة الماعز الصغيرة رشيدة، متشبهًا بـ بكار، لجذب الانتباه إلى مشغولاته اليدوية، لبيعها وكسب الرزق منها.
بكار الزمالك بصحبة رشيدة لبيع الإكسسورات
نجحت فكرة إبراهيم أو بكار وفقًا لشهرته، ووقف بمنطقة الزمالك، بصحبة رشيدة الصغيرة، وبالفعل جذب انتباه الكثيرين، لشراء منتجه اليدوي، والتقاط الصور مع رشيدة، التي صاحبت العديد منهم في طفولتهم، خلال مشاهدة مسلسل الرسوم المتحركة الرمضاني بكار.
رحلة بكار من أسوان للزمالك
يروي بكار لـ القاهرة 24، تفاصيل رحلته من أسوان إلى الزمالك، قائلًا: أنا خريج صنايع وزخرفة، بقالي سنين بشتغل في القاهرة وبسافر من أسوان لهنا، لكن من 3 سنين، قررت اتعلم أعمل إكسسورات، وأبيعها، وجاتلي فكرة رشيدة وبكار، عشان ألفت انتباه الناس لشغلي.
أعجب المحيطين بفكرة بكار، وبات المارين يلتقطون الصور التذكارية مع رشيدة وبكار، ومن ثم شراء المنتج الخاص به اليدوي، لكن لم يدوم الحال المستقر طويلًا.
عقبات بكار خلال رحلته
تأزم عدد من سكان الزمالك، من شكل إبراهيم بكار ورشيدة، وقرروا إبلاغه بعدم اصطحاب رشيدة، موضحًا: عملت اللي عاوزينه، ومبقتش بنزل برشيدة، لحد ما جم قالولي احنا مش عاوزينك أنت كمان.
وأضاف بكار: التقط أحد المارة صورة لي مع رشيدة، ونشرها عبر مواقع التواصل الاجتماعي، متابعًا: كتب على الصور، إني جايب رشيدة معايا، عشان أصور الناس معاها بـ 10 جنيه، وده مش حقيقي، اللي عاوز يتصور معاها بيتصور ببلاش، الفلوس بأخدها على شغلي بس.
نفسي اشتغل في مكان آمن
يطالب إبراهيم بمكان مرخص يبيع مشغولاته اليدوية فيه، لكسب الرزق، مختتما حديثه: أنا مش بشحت، ده مصدر رزقي الوحيد، ومحتاجه عشان أصرف على والدي المريض.. نفسي في مكان أشتغل فيه بآمان.
