بعد 10 سنوات جواز.. سيدة في دعوى طلاق ضد زوجها بسوهاج: السرير بيقع ومش راضي يغيره
شهدت قاعات محكمة الأسرة بمحافظة سوهاج، قيام ربة منزل في منتصف العقد الرابع من العمر، برفع دعوى طلاق ضد زوجها لتضررها منه، بسبب وجود خلافات أسرية متكررة فيما بينهما على إثر طلب الزوجة من زوجها تغيير "عفش المنزل" بعد تهالكه، ورفض الزوج لهذا الطلب.
سيدة في دعوى طلاق بسوهاج: السرير بيقع ومش راضي يغيره
وتقول الزوجة (منى. م. ع) 36 عامًا، تقيم ناحية دائرة مركز سوهاج، إنها تزوجت منذ أكثر من 10 أعوام، من شخص متوسط الحال، يعمل كاشير في أحد المحال، ونظرًا لكون دخله وقتها كان بسيطًا، وافقت أسرتها على إتمام الزواج بغرفة نوم مستعملة.
وتضيف الزوجة: بعد ما اتجوزنا بحوالي 3 سنين سافر للسعودية بعقد عمل وفضل هناك لمدة 5 سنين، نزل فيهم مرتين، وربنا كرمه بشغل كويس في السعودية والحالة أصبحت أحسن من الأول.
وتشير الزوجة أن غرفة النوم وباقي عفش البيت أصبح لا يصلح للاستخدام نظرًا لكونه مستعملًا منذ البداية، فطلبت من زوجها تغييره بآخر تكون حالته جيدة إلا أن زوجها رفض الفكرة، وكان دائم التشاجر معها لهذا السبب.
وتضيف: عفش البيت أصبح كهنة ومش عارفين ننام عليه والسرير بيقع وكراسي الأنترية مخلعه وانا اتحملت ووافقت عليه عشان ما كانش معاه فلوس يومها يجيب عفش جديد، لكن دلوقتي ظروفه بقيت كويس والحمد لله شغله في السعودية دخله كويس، لكن هو مش عايز يعوضني عن سنين التعب والحرمان اللي عشتها معاه من أكتر من 10 سنين، دا انا بكون مكسوفة من أختي وجوزها لما بييجوا عندنا من حالة البيت اللي معيشني فيه.
تستمر الزوجة في طلبها من زوجها، تغيير غرفة النوم المتهالكة، ويستمر الزوج في رفضه دون أسباب، لتدخل الأسرة بعد ذلك في خلافات ومشاجرات، ما دعى أسرة الزوجة التدخل، وأمام تعنت الزوج وإصراره على موقفه، لا تجد الزوجة طريقًا سوى طلب الطلاق من زوجها، وترفع دعوى بمحكمة الأسرة.
