إيمان العاصي: نفسي أشوف بنتي ناجحة.. ومش شرط أشوفها عروسة
تحدثت الفنانة إيمان العاصي عن ابنتها، مشيرة إلى أنها لا تتمنى أن تراها عروسة ولكن تتمنى أن تراها شخصية ناجحة.
وقالت إيمان العاصي خلال لقاء تلفزيوني: بنتي بتحس بيا بشكل مش طبيعي وهي أحن حد عليا في الكون وأصدق حد في حياتي بكل ما تحمله الكلمة من معنى، وبنتي غريبة جدًا خاصة أن هي طفلة ومش عارفة بتفكر كده إزاي ولما بتحس إني مضايقة حتى لو ما بينتهالش بتعرف.
وأضافت: بنتي ولو زعلانة من حاجة بتحبس دموعها علشان ما اتأثرش، وبقيت أدعي ربنا أنه يخليني ليها لأنها أحلى حاجة في الحياة وصاحبتي أوي وبحكي لها اللي ممكن أحكيه لحد في سني.
إيمان العاصي تكشف نصائحها لابنتها
وتابعت: لما بكون معجبة بحد بقول لبنتي وكأنها 30 سنة، ومفيش حاجة بخبيها عنها لأني خايفة مكملش ومقدرش أعيش لها ونفسي تقدر نفسها وتحب نفسها وتكون هي رقم واحد من غير ما تكون أنانية ومتثقش في حد غير نفسها وأنا لأني مش عايزاها تتوجع.
وأردفت إيمان العاصي: بقول لبنتي أوعي تقولي لي عايزة أتجوز وبحب حد، أنا نفسي أشوف بنتي ناجحة ومش شرط أشوفها عروسة وعايزاها تلف العالم وتكون مبسوطة.
وحققت إيمان العاصي نجاحًا من خلال مشاركتها في مسلسل جعفر العمدة الذي عرض ضمن الموسم الرمضاني 2023، إذ جسدت دور دلال إحدى زوجات محمد رمضان في العمل الذي أخرجه محمد سامي.
