نهى عابدين: الستات مظلومين ومسلسل تحت الوصاية جه على الوجع.. وكنت عايزة أعتزل وأهاجر
كشفت الفنانة نهى عابدين كواليس تعاونها مع الفنانة منى زكي في المسلسل الرمضاني تحت الوصاية، كما تحدثت عن فترة اكتئابها وطريقة خروجها منه.
وقالت الفنانة نهى عابدين، خلال لقائها بقناة Cbc: الستات مظلومين، وصعب اللي بيحصل فيه مش بس في مسلسل تحت الوصاية، وفي كل المجتمعات العربية، ومسلسل تحت الوصاية جه على الوجع، ومش بياخدوا أبسط حقوقهم.
وتابعت نهى عابدين حديثها عن التعاون مع الفنانة منى زكي، إذ قالت: نفسي أعمل دور مختلف حلو ويضيف لي ويكون عمل فني مهم، وكان نفسي أشتغل قدام منى زكي، استفدت منها الالتزام، وكنت عايزة أتعلم منها، وهي بتحترم المخرج مهما كانت نجوميتها، ومش متسلطة، وبتسمع كل واحد في الكواليس، مش بيهمها شكلها، أهم حاجة عندها إن هي تعمل الدور، وعندها ثقة في نفسها، وبسيطة جدًا، ولسه عندها شغف في التمثيل، وبتدخل اللوكيشن بتبقى متوترة ومرعوبة.
نهى عابدين: عرفت إني مسكت الطريق بعد ونوس ومسلسل حلاوة الدنيا
وأردفت نهى عابدين في حديثها عن أبرز أدوارها، قائلة: عملت دور في ونوس، وحلاوة الدنيا، بعدها عرفت إني مسكت الطريق، وعملت حاجات بسيطة بس كانت عادية، ومساحة الأدوار كانت أكبر، والأدوار كان مركبة ومعقدة، والموضوع مش مساحة بس، والدورين دول مساحة وديني مساحة أطلع التمثيل اللي عندي، ومش ضد ولا مع 15 أو 30 حلقة، طالما يتواجد إيقاع وأحداث، ومش بعدد الحلقات، الورق أهم حاجه.
نهى عابدين: سبت نفسي للاكتئاب
وعن فترة اكتئابها، قالت نهى عابدين: سبت نفسي في الاكتئاب وعملت كل حاجة، جبت قاع الاكتئاب، سيبي وقتك للحزن، اكتشفت في نفسي قعدت مع نفسي في عزلة، وتجربة الاكتئاب خليتني أكتشف حاجة في نفسي، لما قعدت مع نفسي قررت إني بدمر نفسي واللي بعمله مينفعش، وابتديت إني أقوم وروحت لدكتور نفسي، ولازم كل فترة كبنى آدمين نروح لدكتور نفساني أعمل تنظيف وصيانة لنفسي، وقعدت أحضر لمشهد الجهاز وهو بيتكسر نفسيًا، والمشهد الأخير في المسلسل.
وتابعت: أنا شخص حمول أوي وعاطفية، لما يتواجد عندي تراكمات، ببقى عايزة اختفى، وكنت عايز أعتزل وأهاجر، البنى آدم حياته عبارة عن دواير ومتصلة ببعض، ولو في دايرة في خلل هيأثر على الباقي، والممثل يجب أن يفصل قدام الكاميرا بس، في الآخر إحنا بنى آدمين، وعندي جهاز عصبي واحد، وكل الحاجات دي بتخلي الفنان يكون قدرته التمثيلية.
نهى عابدين: أتعلمت من يحيى الفخراني من قبل الكلام.. وأداني مفاتح كثيرة في التمثيل
واستكملت نهى عابدين: مجرد ما اشتغلت مع دكتور يحيى الفخراني، وأتعلمت منه قبل الكلام، وإداني مفاتيح كتير أوي في التمثيل، فكرة إني مفقدش الأمل، ومستعجلش، ومقبلش بالمتاح، ومتنزلش عن أي حاجة، وبحب نوعية أدوار معينة، مش بحب أعمل حاجه إني أعمل زي دور مبقاش مصدقاه، وطبيعي كممثلة إني أعمل أدوار بعيده عني أو ضد مبادئي.
نهى عابدين: اعتذرت عن دوري في مسلسل مذكرات زوج لإني مش بعرف أضغط على نفسي
واختتمت نهى عابدين: اعتذرت عن دوري في مذكرات زوج، مبعرفش أضغط على نفسي وأطلع من موقع تصوير لموقع تصوير، ومقدرش أعمل عملين في نفس اليوم، ولازم أركز في حاجة واحدة وهتفدني أكتر.
