شيحة: الإسماعيلي دمه مستباح منذ بداية الموسم.. ونواجه عصابات داخل النادي
تحدث محمد شيحة نائب رئيس اللجنة المعينة لإدارة نادي الإسماعيلي عن مباراة المصري في كأس الرابطة والتي انتهت بخسارة الدراويش بهدفين نظيفين.
وقال شيحة في تصريحات إذاعية: أؤكد على احترامي وتقديري للتحكيم المصري، ولكن هذا الموسم بالنسبة للإسماعيلي منذ بدايته نتعرض لظلم بين، بدون ذكر أسماء محددة، ولكن الإسماعيلي دمه مستباح جدا منذ بداية الموسم.
وتابع: لا توجد حلول لأزمات التحكيم التي نتعرض لها، في مباراة الأمس، محمد هاشم احتاج لـ 4 غرز ولم يحصل على خطأ حتى، هناك أكثر من إصابة دموية في المباراة، رغم أن الحكم دوره هو حماية لاعبي الفريقين.
وأضاف: لاعبو الإسماعيلي لم يجدوا أي حماية في لقاء المصري، لو اللاعبين دول بيلعبوا في أهلي ولا زمالك ولا فيوتشر وبيراميدز كان هيبقى الوضع مختلف، مستطردا: استفدت أنا ايه بالتحليل التحكيمي وأن طلع ليا حق؟ هو الحكم ده إله؟
طلبنا بإعادة المباراة إثباتا للحق
وأردف: طلبنا بإعادة المباراة إثباتا للحق ليس إلا، كل التقدير والاحترام للنادي المصري ونبارك لهم على المباراة والفوز، لازم نخسر علشان نستفيق ونعيد الهيكلة، مفيش حد بيكسب على طول، كرة القدم مكسب وخسارة وبعمل إثبات حق.
وأكمل شيحة حديثه، قائلًا: طلبنا عدم إدارة الحكم خالد الغندور لأي مباراة للإسماعيلي مرة أخرى بعدما حدث في مباراة المصري، متابعا: احنا مش ناقصين، احنا ربنا ساترها معانا بالعافية وكفاية البلاوي اللي جوة النادي وكفاية إن محدش بيساعد النادي وكله غسل إيده وسابنا.
واستطرد: احنا حاليا طلعنا النادي من القبر دخلناه غرفة الإنعاش، مستعدين نقدم استقالتنا لو في حد عاوز يبقى متواجد مكاننا، اللي قادر يشيل الليلة يجي يشيلها واحنا مستعدين نمشي، مستكملا: أنا بقالي 3 شهور ماسك النادي لم أخسر إلا مباراة المصري، ربنا ساترها علينا.
وواصل: مفيش جنيه في النادي، المحافظ دفع مرتبات لحد الشهر اللي فات، في موقف مع الشركة الراعية، وقد يتم فسخ التعاقد معها، مدى قانونية العقد من عدمه فيها نقاش في جلسة خلال ساعات، لو لم نصل لحلول خلال الجلسة سيتم فسخ التعاقد.
وذكر: الإدارة لم تسلم من جلسات النميمة رغم إننا لم نصل إلى منطقة الأمان، تولينا إدارة الإسماعيلي وهو يملك 12 نقطة، وحاليا نملك 26، مضيفا: هنلاقيها من مين؟ من الرعاة ولا العصابات والمتآمرين داخل النادي ولا اللي سايبين النادي مديون بملايين، هلاقيها منين ولا منين، أنا بعلن استقالتي على الهوا لو في راجل في الإسماعيلية قادر يشيل الشيلة يتفضل.
