خالد دياب: تحت الوصاية 15 حلقة فقط لتجنب المط.. وكل واحدة بجودة أفلام السينما
كشف المؤلف خالد دياب، السبب وراء عرض مسلسل تحت الوصاية بطولة الفنانة منى زكي، من 15 حلقة فقط، موضحا أنه كمؤلف يفضل هذه النوعية أكثر.
وقال خالد دياب خلال لقائه مع القاهرة 24: اخترنا العمل يكون من 15 حلقة فقط، لأن إحنا ككتاب شوفنا إن وزن القصة المنطقي هو الـ 15 حلقة، والأحداث اللي إحنا نملكها تغطي العدد ده من الحلقات، فتجنبا للمط وعشان نزود من جودة الحلقات، لجئنا للعدد ده.
وتابع دياب كاشفا النوعية التي يفضلها في أعماله، قائلا: أنا عموما في المستقبل عايز أعمل الـ15 حلقة بس، قولا واحدا، لأن العمل بيكون مكثف وكل حلقة بتوصل جودتها لجودة السينما، لكن الـ 30 حلقة بتكون عاملة زي الشخص اللي بيجري 5 آلاف متر، غير إن المؤلف بعد الحلقة 12 بيبدأ يعاني ويفكر يحط أحداث إيه لحد ما يوصل للـ 30.
كما كشف خالد دياب سابقا، عن بداية فكرة مسلسل تحت الوصاية، قائلا: كان ليا مجموعة من الأقارب بيعشوا نفس قصة الوصاية، وعاصرنا حاجات ممكن تكون أصعب من اللي حصلت في المسلسل لكن لو وضعناها هيكون فيها شوية مبالغة من وجهة نظرنا، فقررنا نعمل حاجة عن الوصاية.
وتابع حديثه، مؤكدا أن المؤلفة شيرين دياب كان حماسها كبير تجاه قصة العمل، معلقًا: شيرين دياب كانت متحمسة جدا لفكرة المسلسل، ولما عرضنا الموضوع على المنتج محمد السعدي لشركة ميديا هب، وافق على الفكرة بدون تفاصيل القصة، والمخرج محمد شاكر خضير برضه كان صاحب روية واقعية وكان إضافة كبيرة للعمل.
مسلسل تحت الوصاية
ضم مسلسل تحت الوصاية، عددا من الفنانين، إلى جانب الفنانة منى زكي، من بينهم دياب، مها نصار، رشدي الشامي، نهى عابدين، خالد كمال، محمد عبد العظيم، علي صبحي، وآخرين، ومن إخراج محمد شاكر خضير.
