أحمد عبد الله صاحب شخصية كارم فتح الله في جعفر العمدة: مشهدي مع ثريا انتصار للست المصرية
تحدث الفنان أحمد عبد الله عن كواليس مشاركته في مسلسل جعفر العمدة بطولة الفنان محمد رمضان، والذي عرض ضمن الموسم الرمضاني 2023، والذي جسد فيه دور كارم فتح الله.
وقال أحمد عبد الله في لقاء تلفزيوني: من أهم الكواليس مشهد ضرب سيد العمدة لأننا كنا بنصوره في الشتا الساعة خمسة الفجر ودرجة الحرارة في مدينة الإنتاج كانت صفر، وكنت ببص جنبي على هالة صدقي ألاقيها وافقة 16 ساعة وما تأثرتش فكنت بقول لنفسي أختشي بقى.
الكواليس بينا كانت عاملة زي فريق الكورة
وأضاف أحمد عبد الله: الكواليس بينا كانت عاملة زي فريق الكورة اللي عاوزين يجيبوا كأس العالم، ولو حد شاف حد أدائه بره المود يقول له لو النصيحة ما جاتش المشهد هيطلع وحش، وممكن ممثل يعليك وممثل يوقعك.
محمد رمضان كاريزما طاغية
كما تحدث أحمد عبد الله عن محمد رمضان قائلًا: كاريزما طاغية ومشاهدي معه كلها كانت ماستر سين، ولو أدائي مش على قد نجم زي محمد رمضان هتكشف.
محمد سامي بيعشق الممثل
وعن محمد سامي، قال: عنده المقدرة يدخلك اللوكيشن وأنت بتضحك ولو عاوز جو تنشنة يزعق علشان يوصل لك للمود ده، وأكتر مشهد كوميدي لما محمد رمضان دخل بزينة على زوجاته وهو متجوزها، ومحمد سامي بيعشق الممثل.
وتابع أحمد عبد الله: وإحنا بنقرأ اسكريبت المسلسل كنا شايفين الشخصيات بتمشي من كتر جمالها.
واستكمل: المشاهد الصعبة بدأت مع مشاهد الأكشن في الحلقة 4 بداية من المعركة بين جعفر العمدة، وكارم اللي أضرب فيها كارم ومشهدي مع ثريا.
وواصل: مشهدي مع ثريا -مي كساب- لما كارم استغلها واستغل فراق ضناها وطلب منها تبوس إيده ده مشهد في قسوة شديدة، والمشهد ده يعتبر انتصار للست المصرية وخد 10 ساعات تصوير.
وأكد أحمد عبد الله أنه شعر بسعادة كبيرة من ردود فعل أقاربه وزملائه بعد تقديمه لشخصية كارم فتح الله، إذ كانوا لا يتوقعون أنه من الممكن ان يقدم شخصية شريرة بهذا الشكل، قائلًا: أجمل كومنت بسمعه لما يقولوا لي مستحيل أنت تعمل الشر ده.
