على قد ما حبينا

• مش بحب أتكلم عن مشاكل شخصية حصلت بين طرفين بشكل معين ومحدد متضمن أسماءهم خصوصًا لما يكونوا شخصيات عامة ومعروفة للناس.. وارد أتكلم عن الحالة بشكل عام بالتزامن مع حدوث المشكلة والناس من نفسها بتقدر تربط الكلام بالموقف لكن أقول فلان وفلانة لأ.. مش بحب اتكلم عشان بحس إن الدرس المستفاد هو الأولى بالتركيز من الأسماء، وفي نفس الوقت مش بلوم على اللي بيحبوا يتكلموا عن أصحاب المشكلة بالأسماء لإني مقتنع إن إعلانك لتفاصيل حياتك الشخصية قدام الكل لازم يقابله استعداد منك إنك تستقبل برضه رأى الكل في مشاكلك لإنك سمحت بكده من البداية.. ليه المقدمة الطويلة دي؟.. لإن النهاردة استغربت لما قريت خبر عن تحرير زوجة مطرب شعبي معروف لمحضر ضده في قسم الشرطة لإنه طردها من منزل الزوجية، واعتدى عليها، وأخد منها الدهب بتاعها، وإيصال أمانة كان كاتبه ليها بديل عن المؤخر!.. يا ساتر!.. دول لازم يكونوا كارهين بعض جدًا عشان ده يحصل بينهم!.. الحقيقة إن لأ.. الزوجة دي من كام شهر كانت بتسجد شكر لله في قاعة الفرح قبل فرحها بدقايق على المطرب الشعبي والناس وقتها انتقدتها إن إزاى تعمل كده، وهي كان ردها إن ده بسبب فرحتها من ارتباطها بفارس أحلامها وحبها القديم!.. هو كمان اتكلم وقال إنه كان بيحبها من زمان بس هي كانت لسه بتدرس في الجامعة وانتظر لحد ما النصيب حصل واتقدم وبقوا سوا.. طب لحظة!.. هو الحب اللي فات راح فين عشان نوصل لمرحلة الضرب والإهانة والطرد والمحاضر؟.. ولا هو على قد ما حبينا على قد ما كرهنا؟.. حالة تخبط وتشتت تخليك فاقد الثقة في أى معايير الناس بتحكم بيها على مشاعرهم.

• ييجي قبل الموقف بتاع المطرب الشعبي ومراته بحوالي يومين تلاتة موقف تاني بس مؤلم وقاسي لـ بنت من طنطا اسمها "آية" قررت أسرتها يجوزوها لشخص مش بتحبه ومش متقبلة شكله وهي توافق مضطرة على الجوازة فيقرر الشخص البشع ده إنه يقتلها في تاني يوم بعد جوازهم بحجة إنها رفضت تديله حقه الشرعي!.. في لحظة انتهت حياة بنت لسه في أول عمرها بسبب قرار بشع من شخص يستحق يتوصف بأى لفظ حقير ييجي في البال.. البنت حياتها خلصت على إيد الشخص اللي المفروض يكون هو أمانها.. والسبب؟.. استهانة الأهل برفض البنت، وضغطهم عليها عشان توافق.. طب رهانكم طلع خسران، وخسرتم فوقه بنتكم؟.. هل ده عدل؟.

• الموقفين اللي فاتوا بيكملهم الموقف اللي حصل من سنة و3 شهور والخاص بعروسة الإسماعيلية واللي أهلها أجبروها على الارتباط بابن عمها اللي ضربها في الشارع بمنتهى العنف وهي بفستان الفرح، وقصتهم انتشرت والصحافة صورت معاهم في البيت بعد كده عشان تخرج قدامهم العروسة بضحكة كان واضح جدًا إنها مزيفة ومتمثلة ومضغوط عليها عشان ترسمها وتقول مفيش حاجة والأمور تمام وسط تأكيدات الأهل إن اللي حصل كان وسوسة شيطان وإنفلات أعصاب عادي في يوم مضغوط زى ده.. اللي هتلاقيه حصل إن الموضوع لما كبر وانتشر العيلة اتلمت على البنت اللي هي أصلًا واضح إن شخصيتها ضعيفة واتقال لها كلام من نوعية "الطيب أحسن"، "خلاص بقى ده جوزك برضه"، "يا بنت الناس لمي الدور".. والنتيجة؟.. اتلم الدور صح بس اتبعترت كرامتها وكرامتهم.. فات أسبوع واتنين وشهر وشهور وبعدها العريس كرر اللي عمله مرة تانية بس تعامل العروسة وقتها كان مختلف وقررت يكون ليها رد فعل طبيعي وحررت محضر ضده وتم القبض عليه والموضوع بقى قضية واتحجزت للحكم.. بصرف النظر إن الأخبار بعد كده كانت بتتكلم عن حدوث تصالح بعد تدخل القريبين منهم، وبصرف النظر برضه عن عدم نشر أى أخبار عن مصير القضية لكن تفاصيل القصة من أولها لآخرها بتثبت إن البداية الغلط لازم يتبعها نهاية مؤذية، وإن اللي معظم الناس يشوفوه بصورة معينة غالبًا بتبقى وجهة نظرهم صح.. مستحيل كلنا هنشوف إن الإعتداء على البنت يوم فرحها شيء مش مقبول، وهنطلع كلنا غلطانين!.

• السنة اللي فاتت تم الإعلان عن مشروع قانون مقدم من عدد من النواب للجنة مشتركة من الوزارات بخصوص إصدار قانون جديد لحتمية الفحص الطبي النفسي للمقبلين على الزواج.. يعني إيه؟.. يعني محدش هيقدر يتجوز سواء راجل أو ست غير وهو مستخرج شهادة طبية معتمدة من وزارة الصحة إنه مؤهل نفسيًا بنسبة ١٠٠٪؜ للخطوة.. ومش مجرد شهادة وخلاص.. لأ.. شهادة بعد مجموعة كبيرة من الفحوصات الشاملة والتحاليل على إيد ناس متخصصين.. بس لحظة.. الشهادة الجديدة هتكون غير الشهادة الصحية التقليدية اللي بتطلع حاليًا تأدية واجب وبالحب وكان فيه ناس بيضربوها.. الجديدة لأ.. الفهلوة، وشغل الرشاوي اللي من تحت الترابيزة مش هيمشي معاها.. الموضوع فيه عقاب بالحبس المشدد وبالغرامة لأى حد هيتلاعب أو يروح يضرب ورقة سواء مأذون أو عريس أو أهل.. الكشف هيكون من خلال لجان خاصة من وزارة الصحة هي اللي هتقيم.. مفيش مأذون هيقدر يكتب عقد جواز ولا هيتم توثيقهم أصلًا بدون الشهادتين دول.. بإذن الله شهور بسيطة ويصدر القانون، وهيبقى خطوة مهمة وعظيمة وهتقلل بنسبة كبيرة اللي كان بيحصل قبل كده وكمية العك اللي بسببها فيه ناس كتير لبست في حيط لما لقوا نفسهم تحت سقف بيت واحد مع شخص محتاج يتعالج مش يفتح بيت.

• التأني في الاختيار، وقبل الخطوات عمره ما كان غلط.. اختيار واحد غلط ممكن يضرك ويضر فرد من أسرتك للأبد، ويصدمك بقائمة خسائر مالهاش آخر.. حتى مع وجود الحب لو كنت من اللي المشاعر بتوجههم أو حتى لو كنت من اللي بتتحكم المصلحة في قراراتهم اختيار غلط واحد بس ممكن يلخبط اللي باقي من حياتك بكره، ويهدم اللي فات، ويخليك بتلملم في اللي فاضل منك ده لو اتكتب لك النجاة!.. البدايات العظيمة بتكون للكل، لكن التكملة بتكون للصادقين بس، واللي بيسبق صدقهم تأني في اختيارهم، ومواقف أثبتت حُسن الاختيار.