أنغام عن المحلن محمد الموجي: ألحانه سهلة وصعبة في نفس الوقت وتحدي للمطرب.. وولادي بيحبوا الموسيقى
أعربت الفنانة أنغام عن سعادتها الشديدة بمشاركتها في حفل روائع الموجي، الذي أقيم أمس على خشبة مسرح أبو بكر سالم بالرياض.
وقالت أنغام في لقاء مع عمرو أديب على قناة Mbc مصر: الحقيقة أنا بشوف إن المغني اللي هو الهاوي اللي بيحب بيعمله، الهواية ديه فكرة لو تمسكت بيها هتفضل متعة على طول، وديه روح الهاوي في الحفلة إنك تغني حاجات مش بتاعتك بتبقى روح الهاوي.
وعن الملحن الراحل محمد الموجي، قالت أنغام: هو عنده جملة سهلة صعبة، جملة قوية أوي وعلى الودن سهلة، وفي نوع من التحدي، نقيت أغنية صافيني مرة، وعيون القلب، صافيني مرة أول مرة لحن من الموجي لعبد الحليم، ومن أوائل الألحان اللي عملها، ولحن صعب جدًا، والملحن عايز يقول إن هو ملحن، ولحن مش سهل أبدًا، وفي استعراض للصوت وهو كملحن.
وأردفت أنغام: أنا ولادي بيحبوا الموسيقى عمومًا، معندهمش مشكلة في الأشكال والقوالب القديمة والجديدة في الأغاني، ومفيش مانع إن إحنا نوثقها، والأستاذ يحيى كتب كام لاين مختلف في الأغاني مع الأوركسترا.
أنغام: مش بعرف أتفرج على نفسي في الحفلة وبطني وجعتني
واختتمت أنغام عن مشاركتها في حفل بالسعودية قبل حفل روائع الموجي: كنت يوم الخميس بغني حفلة العيد في السعودية واتذاعت الحفلة، وأنا بتفرج على التلفزيون ومش بعرف أتفرج على نفسي وبطني وجعتني، واتفاجأت، وطول الحقلة متفاجأة، وقد إيه الحفلة حلوة، وكل حاجة بتحصل وبدور على العيب، ديه حقيقة فيا، والحفلة كانت على مستوى عالي جدًا.
