مدحت العدل: أقدر أناقش المثلية والإلحاد بفن دون ما أشعر إني بضرب المشاهد بسكين | فيديو
تحدث السيناريست مدحت العدل، عن طرح الأفكار الجريئة في المنصات الإلكترونية، وبجانب ذلك حديثه عن الأعمال مع الفنانة شريهان ووجوده في السينما خلال الفترة المقبلة.
وقال مدحت العدل عن الأفكار الجريئة في الأعمال خلال حواره مع القاهرة 24: على حسب طرح الموضوع بيكون ازاي.. الأفكار الجريئة طول عمرها موجودة ومش عيب ولا غلط.. أنا أقدر أقدم أصعب موضوع ومجرحش حد، ولو عايز أناقش المثلية والإلحاد بفن دون ما أشعر أني بضرب المشاهد بسكين.. وكل منصة إلكترونية ليها تجاه.. ولازم يبقى عندنا انفتاح أكتر في تناول الموضوعات.
واستكمل مدحت حديثه: في حالة نشاط ومواكبة لعصر الصناعة.. وفي دلوقتي تحكم في أسعار الفنانين وكله بيصب في الصناعة، مبقاش بدي للنجم تلت تربع ميزانية المسلسل، والمسلسل كله ميتكلفش حاجه وشوفنا مسلسلات معمولة كده والمسلسل محدش شافه.. النجم بيشد أول حلقتين.
وعن قلة وجوده في السينما، أوضح العدل: مش أنا اللي كنت مختفي عن السينما.. السينما كلها على بعضها بعافية.. وهنكمل فيلم ليلة الحنة لهالة خليل.. وهيكون لينا إنتاج كتير في السينما للعدل جروب.
وعن تعاونه مع شريهان بعد نجاح كوكو شانيل: عندنا أعمال مع بعض، ولكن لم أفصح عنها في الوقت الحالي.. وهي راجعة بقوة.
آخر أعمال مدحت العدل
شارك مدحت العدل في السباق الرمضاني 2023 بمسلسل عملة نادرة، والعمل ضم عدد كبير من النجوم أبرزهم، نيللي كريم، أحمد عيد، ندى موسى، جمال سليمان، محمد فهيم، كمال أبو ريه، هشام عاشور، وعدد آخر من الفنانين، والمسلسل من إخراج ماندو العدل، وحقق نجاحًا كبيرًا في الماراثون الرمضاني.
