غادة عبد الرازق: أعتقد منشطات الجيم وعدد ساعات العمل الكتيرة كانت سبب في وفاة مصطفى درويش
أعربت الفنانة غادة عبد الرازق، عن حزنها الشديد لوفاة الفنان مصطفى درويش، كاشفة تفاصيل الأيام الأخيرة قبل رحيله عن عالمنا، وسبب الوفاة.
وقالت غادة عبد الرزاق، خلال ندوتها مع القاهرة 24: كان يوم مصيبة، أنا فاكره اليوم ده وكنت بفطر وبفتح التليفون، وحد قاعد جنبي قالي مصطفى درويش مات، وفتحت التليفون عندي ملقتش حد منزل، ودخلت على الأخبار لقيت صورته ومصدقتش.
وعن سبب وفاة الفنان مصطفى درويش، قالت غادة عبد الرازق: ربنا يرحمه، مصطفى طلع في ناس كتيرة بتحبه، ومكتشفتش ده غير بعد ما مات، كان خاسس جدًا في المسلسل وأنا سألته، والفترة اللي فاتت على طول كان بيروح الجيم، والموت بتاع ربنا، ومتهيألي الحاجات اللي بياخدوها في الجيم بتأثر، والمفروض بتتاخد لـ ناس معينة يتحملوا الكمية، الممثل مش مطلوب منه ده، وبياخدوا الحاجات ديه بيعملوا جيم كتير جدًا، وساعات عمل كتير جدًا، وقلة نوم وتفكير، ممكن فجأة يعمل هبوط في الدورة الدموية، وده خطر جدًا.
غادة عبد الرازق: دلوقتي عندي 52 سنة مقدرش أصور ساعات طويلة
واختتمت الفنانة غادة عبد الرازق: ومقدرش أصور عدد ساعات كبيرة، كنت ممكن أعمله وأنا صغيرة عندي 20 سنة، لكن دلوقتي عندي 52 سنة مقدرش، رحم الله امرئ عرف قدر نفسه.
مصطفى درويش وغادة عبد الرازق في مسلسل تلت التلاتة
وكانت آخر أعمال الفنان الراحل مصطفى درويش هي مشاركته في مسلسل تلت التلاتة بطولة الفنانة غادة عبد الرازق، وجمعهما العديد من المشاهد معًا في العمل.
