المتهم ببيع ابنته على فيس بوك: كنت عاوز أحسّن حالتي المادية شوية | خاص
حصل القاهرة 24 على التحقيقات في القضية التي حملت رقم 12061 لسنة 2023، حول إقدام شخص وزوجته على بيع ابنتهما الطفلة حديثة الولادة، والتي لم تبلغ من العمر سوى يومين، على إحدى صفحات موقع التواصل الاجتماعي فيس بوك، مقابل 150 ألف جنيه.
بيع طفلة حديثة الولادة على فيس بوك
جاء في تحقيقات قضية بيع طفلة حديثة الولادة على فيس بوك، أنه تم رصد عرض صفحة على موقع فيسبوك باسم صحاب يعني، وصحاب بع حسبو، طفلة حديثة الولادة للبيع بمقابل مادي، وبإجراء التحريات والاستعانة بالوسائل العلمية الحديثة، توصل إلى أن صاحب الصفحة هو المدعو عادل.س، المتهم ببيع طفلة حديثة الولادة ابنته على فيس بوك، وعليه تم التواصل معه عن طريق أحد المصادر السرية.
واستدعت جهات التحقيق، الأب المتهم بعرض ابنته للبيع على فيس بوك، وجاءت أقواله أمام جهات التحقيق كالآتي:
س: لماذا قررت عرض الطفلة المجني عليها بالذات للبيع؟
ج: عشان احنا حالتنا المادية بقت صعبة جدا، ومش مستحملين نبقى مسؤولين عن طفل تاني، خصوصا إننا معرفناش نخلي عيشة أولادنا كويسة ولا نعلمهم أو نربيهم كويس.
س: ما الباعث وراء قيامك بعرض الطفلة المجني عليها للبيع؟
ج: عشان خاطر نخلص من مسؤوليتها وكمان ناخد فلوس تحسن حالتنا المادية شوية.
س: هل كانت المتهمة الثانية على علم بقيامك بعرض الطفلة المجني عليها للبيع؟
ج: أيوه بسمة مراتي كانت معايا في الموضوع من الأول، وكنا متفقين مع بعض إننا نعرض البنت للتبني مقابل فلوس.
س: كيف قمت بعرض الطفلة المجني عليها للبيع؟
ج: دخلت على الفيسبوك ولقيت جروب اسمه تبني أطفال أيتام رغم بعد المسافات ونشرت عليه لو حد عايز طفل حديث الولادة يتواصل معايا.
س: ما كان مضمون ذلك العرض بالتحديد؟
ج: هو زي ما قلت كدة بعرض للتبني طفل حديث الولادة واللي مهتم يتواصل معايا.
س: هل كان عرضك للطفلة المجني عليها للكافة؟
ج: أيوه أنا عرضت لأي حد جوا المجموعة بس اللي مش في المجموعة مش هيشوف المنشور.
س: ما اسم حسابك على موقع التواصل الاجتماعي فيسبوك؟
ج: حسابي اسمه صحاب يعني، وصحاب مع حسبو، أنا كنت أقصد أكتب صاحب خانني، وصاحب باع بس هي اتكتبت غلط، وأنا معدلتهاش سيبتها زي ما هي.
س: متى قمت بنشر المنشور المتضمن عرضك للطفلة المجني عليها؟
ج: الكلام ده كان من حوالي شهرين أو ثلاثة بس مش فاكر امتى بالظبط.
س: هل كانت المتهمة الثانية ما زالت حبلى بالطفلة المجني عليها؟
ج: أيوة كانت لسة حامل فيها مخلفتهاش.
س: هل تضمن منشورك مقابل مادي معين؟
ج: لا.
س: هل عاونك شخص آخر في عرض الطفلة المجني عليها للبيع؟
ج: لا.
س: هل من ثمة شخص آخر كان على علم بقيامك بعرض الطفلة المجني عليها للبيع؟
ج: لا محدش يعرف غيري أنا ومراتي.
س: هل حظی عرضك للطفلة المجني عليها بثمة استجابة؟
ج: أيوه في أكثر من واحد كلمني عشان الطفل لما يتولد ومنهم اللي اسمه مصطفى اللي اتفقت معاه.
س: لماذا قمت بالاتفاق مع سالف الذكر بالتحديد دون الآخرين؟
ج: حسيت إنه راجل محترم وإنه جاد.
س: متى قام بالتواصل معك لأول مرة؟
ج مش فاكر امتى بالظبط بس بردو من شهرين أو ثلاثة.
س: كيف تم التواصل بينك وبينه؟
ج: عن طريق مكالمات عادية وكمان شات في الواتساب والماسنجر.
س هل قمت بتسجيل الطفلة المجني عليها؟
ج: لا مسجلتهاش.
س: ما الذي حال دون ذلك؟
ج: أنا كنت متفق مع مصطفى إن هو اللي يسجلها بمعرفته باسمه.
س هل تضمن منشورك على موقع فيسبوك قيام المشتري بتسجيل الطفلة باسمه؟
ج: لأ بس أنا اتفقت على كدة مع مصطفى ده بعدين.
س: متى قمت بالتقابل مع سالف الذكر؟
ج: أنا قابلته يوم 2023/3/12 حوالي الساعة 10 الصبح في ميدان الرماية - دايرة الهرم.
س: ما سبب ومناسبة تواجدك بالمكان والزمان سالفي الذكر؟
ج: أنا كنت هناك عشان أدي لمصطفى ده الطفلة وهو يديني الفلوس.
س: من كان برفقتك آنذاك؟
ج: كان معايا مراتي بسمة وكانت شايلة الطفلة.
س: ما الذي حدث عقب تقابلك مع المدعو مصطفى؟
ج هو كان راكب العربية بتاعته فاحنا رحنا له لسة بنسلم عليه لقيت حوالي أربعة أو خمسة من الحكومة لابسين ملكي مسكونا قبضوا علينا.
س: من قام بضطك بالتحديد؟
س: هم حوالي أربعة أو خمسة من الحكومة لابسين ملكي.
س: هل تم تفتيشك؟
ج: هم ملقوش معيا حاجة غير الموبايل بتاعي.
س: هل الهاتف المحمول السابق عرضه عليك ملكك؟
ج: أيوة.
س: هل كنت تستخدم ذلك الهاتف المحمول في عرض الطفلة المجني عليها للبيع على مواقع التواصل الجتماعي؟
ج: أيوة.
س: هل كنت تستخد ذلك الهاتف المحمول في التواصل مع المدعو مصطفى والاتفاق معه على التقابل وبيع المجني عليها؟
ج: أيوة.
س: ما الذي حدث عقب ضبطك؟
ج: هم ركبوني عربية الحكومة بتاعتهم وخدوني لقسم الأحداث وفضلوا يحققوا معايا هناك وخلونا هناك لحد ما جابوني النيابة.
س: هل من ثمة علاقة أو خلافات بينك وبين محرر المحضر؟
ج: هو اللي حقق معايا بس مفيش بيني وبينه حاجة قبلها.
س: ما قولك فيما سطره سالف الذكر بمحضر الضبط؟
ج: فعلا ده اللي حصل.
س: هل لديك سوابق مماثلة؟
ج: لأ هي قضية سرقة تيار كهربا خدت فيها حكم وعامل فيها معارضة وسلاح ناري خدت فيها حكم سنة مع الإيقاف.
س: أنت متهم بالإتجار في البشر عن طريق تعاملك في الطفلة المجني عليها بالعرض للبيع مع كونها عديمة الأهلية وكونك من أصولها.
ج: حصل.
س: كما أنك متهم بتعريض الطفلة المجني عليها للخطر؟
ج: أنا مكنتش عايز أضرها.
س: هل لديك أقوال أخرى؟
ج: لا.
