غادة عبد الرازق عن التشابه بين جعفر العمدة وعائلة الحاج متولي: مش عيب والأفكار مش حكر على حد
علقت الفنانة غادة عبد الرازق، على المقارنة بين الفنان محمد رمضان والفنان نور الشريف، الذي جسد فكرة مثله والتي قدمها في مسلسله الأخير جعفر العمدة، مؤكدة أن أفكار الأعمال ليست حكرا على أحد.
وقالت غادة عبد الرازق خلال ندوتها في القاهرة 24: الأفكار مش حكر على حد، وفكرة مسلسل الحاج متولي مش حكر على حد، هو قدمها بمنظور محدش هينساه بس برضه من حق أي نجم تاني إنه يعمل نفس الفكرة بس بشكل تاني، زي محمد رمضان، وأنا عملت زهرة وأزواجها الخمسة، هل كدة كنت بقلد الحاج متولي لأنها اتجوزت كتير في المسلسل؟
وتابعت: مينفعش حد يحجر على فكرة لمجرد إنها نجحت معاه، لا من أي حد يحلم إنه يكون زي نور الشريف وده مش عيب، وفكرة إنك تنجح زيه أو تعدي نجاحه ده له عوامل كتير.
وأضافت: مفيش حاجة اسمها إن فلانة لو عملت دور ونجحت جدا فيه وأنا عايزة أعمله معملوش، لا هعمله لأن هي مشترتش الفكرة، دي فكرة جاية من الواقع وزي ما هي عملته ونجحت فيه أنا كمان هعمله وأنجح فيه عادي.
خلافات غادة عبد الرازق ومحمد سامي
على جانب آخر، تحدثت غادة عبد الرازق عن خلافاتها القديمة مع المخرج محمد سامي، وقالت: الخلافات بيني وبين محمد سامي خلصت من زمان، ولما بنتقابل بنسلم على بعض طبعا، وهو نزل بوست في كلام ربنا فـ أنا لازم أرد زي ما برد على أي حد، ومش هنسى إني في يوم من الأيام أكلت عيش وملح معاه.
مسلسل تلت التلاتة
شاركت الفنانة غادة عبد الرازق في موسم رمضان الماضي، من خلال مسلسل تلت التلاتة، الذي يضم عددا من الفنانين، أبرزهم أحمد مجدي، محمد القس، صلاح عبد الله، وآخرين، ومن إخراج حسن صالح.
