علي صبحي: وضعت فكرة ضحكة عيد في مسلسل تحت الوصاية مع المخرج محمد شاكر خضير
تحدث الفنان علي صبحي، عن ضحكته المميزة في مسلسل تحت الوصاية بطولة الفنانة منى زكي، والذي عُرض في الموسم الرمضاني 2023، وحقق نجاحا كبيرا.
وقال علي صبحي، في ندوة تكريم بحارة مسلسل تحت الوصاية في القاهرة 24: الضحكة كانت بالنسبة ليا حاجة طالعة جدًا من شخصية عيد، لأنه شخص مش فارق معاه أي حاجة وهو بيشتغل بمزاجه وشاطر جدًا ولكنه عنده أزمة نفسية، وكان مناسب جدًا يكون عنده حاجة فيها تهكم.
وتابع علي صبحي متحدثًا عن شخصية عيد التي قدمها خلال أحداث مسلسل تحت الوصاية: عيد زيه زي أي شخص في المجتمع بيرفض أن شخص آخر يكون له سلطة عليه خاصة لو ست، مع أن ده مالوش علاقة بـ راجل ولا ست الموضوع له علاقة بالكفاءة، وجزء من شخصية عيد أنه بيرفض أن تكون رئيسته واحدة ست، وبالتالي أي حاجة هيتهكم عليها وهيعمل ده بالضحك.
وأضاف: أنا وأحمد عبد الحميد اخترعنا الضحكة وعرضناها على أستاذ محمد شاكر خضير وعجبته، وده فضل من ربنا، واتمرنت عليها كتير وده من شغلانتي، واللي بنأكد عليه طول الوقت أن الشغلانة دي تعتمد على العمل الجماعي.
ومن جانبه، علق الفنان أحمد عبد الحميد صاحب شخصية شنهابي في مسلسل تحت الوصاية: إحنا شوفنا فيديو 10 ساعات على يوتيوب من ضحكة عيد، ومش عارف مين الشخص اللي ممكن يستحمل يسمع الضحكة كل ده.
أبطال مسلسل تحت الوصاية
وضم مسلسل تحت الوصاية عددا كبيرا من النجوم أبرزهم: منى زكي، أحمد خالد صالح، مها نصار، رشدي الشامي، علي صبحي، أحمد عبد الحميد، خالد كمال، دياب، جميل برسوم، الطفل عمر شريف، وعدد آخر من الفنانين، والعمل من تأليف خالد وشيرين دياب وإخراج محمد شاكر خضير.
