غادة عبد الرازق: صراحتي أذتني وقعدتني في البيت 5 سنين.. وربنا بيجيبلي حقي
كشفت الفنانة غادة عبد الرازق، رأيها في مواجهة الرجل الخائن، مشيرة إلى أن رد الفعل يتوقف على شخصية الرجل، كما أكدت أن صراحتها الدائمة أذتها كثيرا وتسببت في جلوسها من العمل.
وقالت غادة عبد الرازق، خلال ندوتها في القاهرة 24: شخصية الراجل هي اللي بتفرق في نوع رد الفعل على الخيانة، يعني في راجل ممكن تواجهيه وتكوني دخلتي نفسك في الحيطة، وهتقوليله يا أنا يا هي هيقولك هي ولو عايزة تمشي إمشي، فـ هتبقي أذيتي نفسك بس.
وتابعت غادة عبد الرازق: ممكن راجل تكون شخصيته إنه بيخاف، ومجرد ما يحس إنك عرفتي هو يقطع العلاقة من نفسه حوفًا على البيت والأسرة، فـ شخصية الراجل هي اللي بتحدد هتتعاملي إزاي.
وعن صراحتها الدائمة، أضافت غادة عبد الرازق: صراحتي قعدتني في البيت 5 سنين، وعمري ما ندمت على إني أخدت موقف من حاجة ضايقتني، وكنت ببقى فاكرة إن ناس كتير هتقف في ضهري بس محصلش، فـ صراحتي أذتني أنا بس.
واختتمت غادة حديثها، مؤكدة أن الله يعيد لها حقها دائما ممن أذوها، معلقة: ربنا بيجيبلي حقي وعمر ما حد أذاني أو جه عليّ إلا وربنا جابلي حقي.
تقديم غادة عبد الرازق فيلم وثائقي عن حياتها
وسبق، تحدثت غادة عبد الرازق، عن إمكانية تقديمها لـ سيرتها الذاتية في عمل فني، قائلة: ممكن أقدم فيلم وثائقي عن حياتي وهستعرض في كل جوانب حياتي، أنا حياتي كتاب مفتوح للناس كلها، الناس عرفت كل حاجة عني وعن بنتي وأحفادي وغلطاتي.
