الأم المتهمة ببيع ابنتها على فيس بوك: أنا بقبض 800 جنيه وحالتي المادية صعبة جدًا | خاص
حصل القاهرة 24 على التحقيقات في قضية بيع طفلة على فيس بوك التي حملت رقم 12061 لسنة 2023، حول إقدام شخص وزوجته على بيع ابنتهما الطفلة حديثة الولادة، والتي لم تبلغ من العمر سوى يومين، على إحدى صفحات موقع التواصل الاجتماعي فيس بوك، مقابل 150 ألف جنيه.
بيع طفلة حديثة الولادة على فيس بوك
جاء في تحقيقات قضية بيع طفلة حديثة الولادة على فيس بوك، أنه تم رصد عرض صفحة على موقع فيسبوك باسم صحاب يعني، وصحاب باع حسبو، طفلة حديثة الولادة للبيع بمقابل مادي، وبإجراء التحريات والاستعانة بالوسائل العلمية الحديثة، توصل إلى أن صاحب الصفحة هو المدعو عادل.س، المتهم ببيع طفلة حديثة الولادة وهي ابنته على فيس بوك، بالاشتراك مع زوجته وعليه تم التواصل معه عن طريق أحد المصادر السرية، حتى تم القبض عليه.
واستدعت جهات التحقيق، الأم المتهمة بعرض ابنتها للبيع على فيس بوك، وجاءت أقوالها أمام جهات التحقيق كالآتي:
أنا اسمي بسمة.ح، وأبلغ من العمر 36 سنة، وأعمل عاملة تنظيف، واللي حصل إن أنا عرفت أني حامل في الشهر الرابع، بس أنا وجوزي عادل حالتنا المادية صعبة جدًا، ومش هنستحمل نجيب طفل ثاني نصرف عليه، فأنا حاولت أسقط بس معرفتش لأن الدكاترة قالوا إن خلاص وقت طويل عدى، ولو حاولت أسقط ممكن يكون في خطر على حياتي.
أضافت الأم المتهمة ببيع طفلتها أمام جهات التحقيق: بعد كدة عادل كلمني وقال لي إن في ناس مش عارفين يخلفوا ونفسهم في ابن أو بنت، فعرض عليا إن أنا لما أولد اللي في بطني نديه لحد يربيه، وفي الأول أنا كنت رافضة بس هو بعدها أقنعني، خصوصًا إنه قال لي إن العيل اللى هيتولد ده هيعيش حياة أحسن لو اديناه لحد، بدل ما يعيش محروم معانا، فأنا وافقت.
واستكملت الأم المتهمة ببيع طفلتها أمام جهات التحقيق: لما ولدت وجبت بنت قال لي إنه اتفق مع واحد إنه ياخد مننا البنت، وخدني معاه لميدان الرماية، ولسة هنروح نقابل الراجل اللي هو متفق معاه وكان راكب عربية، لقينا الحكومة اتلمت علينا وقبضوا علينا وخدونا قسم الأحداث، وفضلت هناك لحد ما جابونا للتحقيق.
