خالد الجندي: لولا الضوابط الحاسمة لوزير الأوقاف لاستمرت فوضى المساجد والمنابر
قال الشيخ خالد الجندي، عضو المجلس الأعلى للشئون الإسلامية، إنه لولا الضوابط الحاسمة التى أقرها وزير الأوقاف محمد مختار جمعة، لاستمرت فوضى المنابر والمساجد، مضيفا: كنا بنشوف مهازل تلاقي إمام واقف على المنبر وآخر تحت، ده بيقول خطبة والتاني في نفس الوقت بيخطب، والناس بتضحك عليه، غير الخناقات على من يخطب.
خالد الجندي: لولا ضوابط الدكتور مختار جمعة وزير الأوقاف لاستمرت فوضى المساجد والمنابر
وتابع الجندي، خلال حلقة برنامج لعلهم يفقهون، المذاع على فضائية DMC، اليوم الخميس: والله العظيم لولا الضوابط الحاسمة التى أقرها الوزير، لكنا استمرينا فى المهازل الموجودة قبل كده، ده فيه ناس بطلت صلاة بسبب المشاكل والمهازل دي، اللي كانت بتحصل أثناء خطب الجمعة، دلوقتي انتظمت الحركة الدعوية.
واستكمل: دلوقتي تدخل المسجد تلاقي إمام المسجد المعروف بالإمام الراتب، هو قائد المسجد، هو اللى يحدد مين يعمل إيه، وهو اللي يخطب ويؤم الناس في الصلاة، ولو مش موجود بيحدد مين اللي يقوم بمكانه، خلاص انتهت المهازل اللي كانت بتحصل.
وواصل خالد الجندي: الإمام الراتب هو الوحيد اللي تستأذنه في كل حاجة بالمسجد، يعني بتوع الموسيقى عارفين المايسترو، والطيور نفسها ليها قائد يقودها.
على جانب آخر، وجه الشيخ خالد الجندي، عضو المجلس الأعلى للشئون الإسلامية، الشكر إلى الدكتور محمد مختار جمعة وزير الأوقاف، على الجهود المبذولة، فى النهوض بالدعوة وإعمار بيوت الله، خاصة خلال شهر رمضان المبارك.
وتابع خالد الجندي عضو المجلس الأعلى للشئون الإسلامية: يا معالي الوزير مهما قلنا لك مش هنقدر نديك حقك، إنما احتسب عند الله أجرك وما عملت، لأنه الشيء الوحيد الذي يرضيك ويرضي أي إنسان يطلب الأجر من الله سبحانه وتعالى.
