جمال العدل: قررنا نبتعد عن مسلسلات الـ 30 حلقة لأن الممثلين والمخرجين مابيكونوش طايقين بعض
تحدث المنتج جمال العدل عن مسلسل عملة نادرة، الذي شارك في السباق الرمضاني 2023 وحقق نجاحا كبيرا، مؤكدًا أن هذا النجاح يُنسب للمخرج ماندو العدل، يجانب حديثه على اتجاهه للأعمال ذات الـ 15 حلقة.
وقال جمال العدل في ندوة مسلسلي عملة نادرة وحضرة العمدة، والتي أقيمت بدار الأوبرا المصرية اليوم: أنا بدعم ماندو العدل وببقى موجود في إطار كبير، لكن التفصيلات أقسم بالله العظيم هو اللي عامل فاتن أمل حربي وهو اللي عامل عملة نادرة، ثقة مني فيه، لأن هو وسامح عبد العزيز وكاملة أبو ذكر ي وهاني خليفة أكتر ناس اشتغلوا معايا في شركة العدل جروب، وبقيت عارف طريقتهم وهما عارفين طريقتي.
وتابع: أنا بقيت عارف إن ده النص اللي هدخل بيه خناقة رمضان على رأي وحيد حامد الله يرحمه، أنا فخور برد فعل الناس على العمل، وماندو العدل مش لأنه ابني، إحنا بذلنا جهد كبير جدًا كنا بنشتغل في منطقة في أكتوبر على بُعد ساعة ونص جوا الصحراء.
وأضاف: إنتاجيًا ديكور وأبطال كتير ونص مهم وكل حاجة كانت على أعلى مستوى، والنجاح ده لو هيُنسب لحد فهو لماندو العدل مش علشان هو ابني ولكن في أعمال أنا بعملها بحس إن أنا بطلها حتى لو من الفكرة، زي مسلسل سجن النسا وتحت السيطرة أنا صحاب فكرتهم، ولكن في عملة نادرة وفاتن أمل حربي أنا موجود معاهم في الإطار.
جمال العدل: أسامة أنور عكاشة من اخترع فكرة الـ 30 حلقة
وأعرب المنتج جمال العدل، عن رغبته في إنتاج أعمال ذات 15 حلقة، قائلًا: أنا مبسوط برد فعل الناس، وإن شاء الله السنين اللي جاية منعملش مسلسلات 30 حلقة ونعمل 15 حلقة بس كفاية وفي الأصل لما كنا صغيرين الأعمال كانت بتبقى صغيرة، وكتير أوي نكون بنعمل 30 حلقة، أسامة أنور عكاشة هو اللي اهترع هذا الاختراع لأنه راجل أديب.
واختتم حديثه قائلًا: وكون إننا بنعمل 30 حلقة شيء مرهق جدًا وبنيجي في الآخر الممثلين مبيطيقوش بعض والمخرج مبيبقاش طايقنا ولا إحنا بنبقى طايقينهم، مشواره كبير 5 شهور.
