خالد الفايد يرد على زوجة هاني محروس: جوزك كان بيجبلي لبس مقطع.. وطردني في الشارع لما توبت
رد خالد الفايد، نجم برنامج ذا فويس، على هجوم زوجة المنتج هاني محروس، مؤكدًا أنه طُرد في الشارع لمدة 3 أيام بعد اعتزاله الغناء.
وكتب خالد الفايد عبر حسابه بموقع فيسبوك: أولا أنا مرضيتش أذكر ديانات أبدا في الموضوع ثانيا أنتي مراته وأكيد محموقه عليه وزعلانة، ثالثا البوستات اللي كان بيقولي امسحها كانت بوستات دينية وربنا شاهد لما كنت منزل بروفايل مكتوب فيه (محمد صلى الله عليه وسلم ) لقيته بيقولي مينفعش تنزل ده امسحه ودا غلط.
وواصل خالد الفايد: رابعا أنا لما قلتله عاوز لبس علشان أنا فنان ومنظري لازم يكون كويس قالي حاضر، وجابلي كارتونة فيها لبس مهري وكوتشيات مقطعة، ولما زعلت راح مطلعلي ألف جنيه بيقولي خد اشتري لبس.
وأضاف خالد الفايد: خامسا أنا مكنتش قاعد في بيته ولا حاجه دي شقة الشركة اللي أنا كنت ماضي فيها وطبيعي كان من حقي اقعد فيها وهو لما أنا بطلت غناء طردني من الشقة، ومنع عني مصروفي وأنا كنت بايت ٣ أيام في الشارع وربنا شاهد على كلامي، ثم مين قال إني عايز العقد علشان أشتغل مع حد تاني؟ أنا لو عايز أنجح هيكون مع هاني محروس لأنه منتج شاطر وشركة تقيلة إنما أنا صدقت في توبتي لله عز وجل وأنا مش كداب زيكم ولا بعرف أكدب.
واختتم خالد الفايد، حديثه قائلا: سبحان الله هاني واللي معاه مش عارفين يردوا عليا بعد ما وضحت كل حاجة، راحت مراته منزله بوست بتشكك في مصداقية توبتي، علشان الناس بتدعمني وعلشان أنتوا واقفين جمبي وعلشان أنتوا أهل حق مترضوش أبدا بالغلط، وهما طالعين يشوهوا سمعتي ويشككوا في توبتي.
زوجة هاني محروس تهاجم خالد الفايد
وسبق وهاجمت زوجة المنتج هاني محروس، نجم ذا فويس خالد الفايد، بعدما أكد الأخير في تصريحات سابقة لـ القاهرة 24 أنه تلقى تهديدات من هاني محروس بسبب اعتزاله الغناء.
وكتبت زوجة هاني محروس عبر حسابها بموقع فيسبوك: أنت قبل ما تعتزل بنص ساعة كنت عايز عقدك علشان زعلان من هاني أنه أول مرة يزعقلك علشان بتنزل بوستات هبلة وبيقولك أنت مشروع نجم ولازم تاخد بالك من تصرفاتك، وهاني محروس دا اللي قعدك في بيته في القاهرة سنتين و24 ساعة قاعد في الأستوديو معاه ومع فنانين مصر كلهم واعتبرك ابنه.
وواصلت زوجة هاني محروس: لكن خالد الفايد كان عايز العقد علشان يشتغل لوحده ويبعد عن هاني مش علشان يعتزل خالص.
