غادة عبد الرازق: النقاد أهم ناس في مشواري الفني.. وأعمالي بتُنتقد من أول حلقة
تحدثت الفنانة غادة عبد الرازق، عن الانتقادات التي دائما تلاحقها، مشيرة إلى أنها ظُلمت كثيرا خلال حياتها على الصعيد الفني والشخصي.
وقالت غادة عبد الرازق خلال ندوتها في القاهرة 24: أنا اتظلمت كتير في حياتي، وأنا صغيرة وفي كل مراحل حياتي، وفنيا طبعا اتظلمت، مفيش حد بيسلم من أذى الناس، والفنان مدام اختار طريق صعب يبقى يتحمل عواقبه.
وتابعت: تعرضت لانتقادات غير بناءة كتير جدا، وفي فرق بين النصيحة والانتقاد، زي لما بنصح بنتي روتانا بقولها بلاش تلبسي عدسات لأن عينيكي الطبيعية أحلى، فدي نصيحة ليها مبرر ودافع حب، لكن في ناس مجرد بتكون عايزة تضايقني.
وأكدت غادة عبد الرازق، أنها لا تهاجم النقاد الفنيين، قائلة: أنا عمري ما اتضايقت من النقاد، بالعكس دايما بقول إنهم أهم ناس في مشواري، لأنهم أول ناس وقفوا معايا في طريقي، لكن بطلب إن لو حد بيحبني ولقاني مثلا عملت عمل مش حلو، يتصل بيا بيني وبينه يقولي ليه عملتي مسلسل وحش زي ده، لكن مش لازم الانتقادات تكون من أول حلقة كده.
وفي هذا السياق، انتقدت غادة عبد الرازق هجوم الجمهور على الفنانة منى زكي ومسلسلها الأخير تحت الوصاية، قائلة: الجمهور كمان بقى بينتقد العمل من أول ما البوستر ينزل، زي ما عملوا مع مسلسل تحت الوصاية، المسلسل كان لسه منزلش، وبينتقدوا شكل منى زكي وحواجبها، طب ما ممكن الشخصية هي اللي تكون طالبة كدة، إحنا بنتفرج على ممثلين برة بنلاقيهم ممكن بيزيدوا بالسبعين كيلو عشان دور معين، وبياخدوا أوسكار على ده، لكن إحنا مش بنتقبل الممثلة تطلع بشكل تاني أو كبيرة في السن أو محجبة.
مسلسل تلت التلاتة
يذكر أن مسلسل تلت التلاتة يعد آخر أعمال الفنانة غادة عبد الرازق، الذي شاركت به في موسم رمضان 2023، وشارك بالعمل عدد من الفنانين، أبرزهم الفنان محمد القس، أحمد مجدي، ليلى أحمد زاهر، وآخرين، ومن إخراج حسن صالح.
