غادة عبد الرازق: أنا نجمة ومش محتاجة اسمي على التتر وأؤيد إلغاءه
أكدت الفنانة غادة عبد الرازق، أنها لا تمانع من مشاركة البطولة مع نجم صف أول مثلها في عمل ما، قائلة إن لا داعي لخلافات النجوم على التتر.
وقالت غادة عبد الرازق خلال ندوتها في القاهرة 24: معنديش مشكلة أعمل بطولة عمل مع نجم زيي، وأنا أكتر واحدة طالبت بده، ومن 6 سنين مثلا بطلب إن يكون في أفلام فيها نجوم كتير.
وتابعت: وساعتها مش لازم نركز في حتة أسماء النجوم على التتر والخلافات عليها، لأن كلنا مشهورين ومعروفين ومش محتاجين نتحط على التتر أصلا، إحنا نجوم باسمائنا مش محتاجين التتر، وبـ أؤيد جدا فكرة إن لو عمل بيجمع عدد من نجوم الصف الاول إننا نلغي التتر.
وعن أعمالها المقبلة في السينما، قالت: عندي فيلم قريب إن شاء الله، وبيديني حالة جميلة أوي، وكنت بروح التصوير أضحك بس، لأن الواحد لما بيشتغل مع ناس حلوة، بتديله طاقة إيجابية جميلة جدا.
غادة عبد الرازق: تعرضت لـ انتقادات غير بناءة كتير
سبق وتحدثت الفنانة غادة عبد الرازق، عن الانتقادات التي دائما تلاحقها وتلاحق أعمالها، قائلة: تعرضت لانتقادات غير بناءة كتير جدا، وفي فرق بين النصيحة والانتقاد، زي لما بنصح بنتي روتانا بقولها بلاش تلبسي عدسات لأن عينيكي الطبيعية أحلى، فدي نصيحة ليها مبرر ودافع حب، لكن في ناس مجرد بتكون عايزة تضايقني.
واستكملت حديثها قائلة: أنا عمري ما اتضايقت من النقاد، بالعكس دايما بقول إنهم أهم ناس في مشواري، لكن بطلب إن لو حد بيحبني ولقاني مثلا عملت عمل مش حلو، يتصل بيا بيني وبينه يقولي ليه عملتي مسلسل وحش زي ده، لكن مش لازم الانتقادات تكون من أول حلقة.
