المؤلفة شيرين دياب: كتابة مشهد النهاية كان الأصعب في مسلسل تحت الوصاية
كشفت المؤلفة شيرين دياب، أصعب مشهد واجهها هي والمؤلف خالد دياب، أثناء كتابتهما مسلسل تحت الوصاية بطولة الفنانة منى زكي، مشيرةً إلى أن نهاية هذا العمل تعد نهاية لقضية بأكملها.
وقالت شيرين دياب خلال حوارها مع القاهرة 24: مشهد النهاية كان أصعب مشهد واجهناه في كتابة تحت الوصاية، وخدنا وقت فيه كتير أوي، مش فكرة مش عارفين نكتبه بس الفكرة إن كل شوية نكتب المشهد ونرجع نبص فيه تاني.
وأردفت قائلة: كنا خايفين أوي وإحنا بنكتبه لأن ده مش مسلسل من نوع إن النهاية تعجبك أو لا، ده مسلسل بيناقش قضية، فالنهاية دي هي نهاية لقضية، وقعدنا نفكر مين اللي هينتصر وإيه هيكون مصير حنان البطلة وولادها، وهي مشكلتها الأساسية كانت مع القانون.
وسبق وكشفت شيرين دياب موقفها من الإخراج، قائلة: فكرت في فكرة الإخراج وأخدت ورش، ولكن مكملتش ومأجله الخطوة وعايزة أنزل مساعدة مخرج واقعي داخل اللوكيشن والأجواء، وحابة إني آخد الخطوة عشان حاسة إنها هتضيف ليا.
كما تحدثت شيرين دياب، عن العمل مع أشقائها، قائلة: معندناش اتفاق إننا نشتغل مع بعض أو لأ، بنحاول في شغلنا مع بعض نطلع أي حاجة بأحسن صورة، ولكن لو كل واحد فيهم مشغول في مشروع هقدم عمل لوحدي، ولكن أنا مقتنعة إن العمل الجماعي بيطلع جوانب كثيرة، وماعندناش غيرة في الأسماء من بعض.
مسلسل تحت الوصاية
على جانب آخر، شارك في بطولة مسلسل تحت الوصاية عدد من الفنانين، إلى جانب الفنانة منى زكي، أبرزهم الفنان دياب، نهى عابدين، رشدي الشامي، وآخرين، ومن إخراج محمد شاكر خضير.
