جمال العدل: السوق السعودي رجعني للسينما.. وأنا بشتغل مع أهم نجمات بالوطن العربي
كشف المنتج جمال العدل سبب عدم تعاقد شركة العدل جروب مع عدد كبير من الفنانين لتقديم عدد كبير من الدراما في شهر رمضان، بجانب الحديث عن سبب ابتعاده عن الإنتاج السينمائي الفترة الماضية.
وقال العدل في لقائه مع القاهرة 24: كل شركة إنتاج بيكون ليها عدد معين من المسلسلات مش مسموح إني 9 مسلسلات زي زمان، ولأن كلنا بنعمل مسلسلات وبنبيع للشركة المتحدة للخدمات الإعلامية بقى كل شركة إنتاج ليها مسلسلين بحد أقصى.
وتابع جمال العدل: بالتالي مينفعش إن يسرا ونيللي كريم يكون معروض عليهم أعمال من شركات أخرى، ورفضوها علشان يشتغلوا مع العدل جروب وأروح أنا أشتغل مع غيرهم، وهما من أهم النجوم في الوطن العربي، وهذا لا يمنع إني بعمل أفلام في الوقت الحالي لمحمد رمضان ومنى زكي.
جمال العدل: مبخافش من التعامل مع المبتدئين
وأكد المنتج جمال العدل أنه لا يقلق من التعاون مع المبدتئين، قائلًا: مش بقلق أتعامل مع كٌتاب جداد، والكاتب أسهل شيء التعامل معاه لأنه لسة على البر، لكن لو جبت مخرج جديد وطلع مش حلو أنا أروح منه فين؟ إنما الكاتب بيتعرف من الورق إذا كان شاطر ولا لأ، ومصر طول الوقت فيها كُتاب شاطرين.
وأضاف: أنا كشركة العدل جروب ياما طلعت كُتاب ومخرجين ومديرين تصوير ومهندسين ديكور، يعني مهندس الديكور بتاع مسلسل عملة نادرة أول مرة يعمل ديكور في حياته كان في مسلسل خاص جدًا سنة 2008، وقالي أنت جبتني منين، وأنا كنت شوفته في فيلم تسجيلي وجبته، وأنا مبخافش أتعامل مع المبدتئين.
أما عن سبب ابتعاده عن الإنتاج السينمائي خلال الفترة الماضية، فعلق جمال العدل قائلًا: سوق السينما متغير زي كل الأسواق، وبالتالي الأمر الطبيعي كنا بنشتغل في وقت وبعدين حصل تحالفات خلت المنتج من الدرجة الثانية، يعني أنا عندي فيلم وأصحاب السينما عندهم أفلام، فطبيعي يعرضوا أفلامهم في الوقت الكويس ويسيبوا أفلام، فبقيت أنا بتعامل معاملة مكنتش حاببها، ولذلك اتجهت للدراما.
واستكمل: لما السوق السعودي فتح وده سوق مهم جدًا وأهم من السوق الخليجي كله، لأنه فتح سينمات بعدد ضخم جدًا يستوعب يكون فيه محتوى، وبيجيبوا أفلام من العالم كله والفن المصري مطلوب، وعلشان كده قررت أرجع للسينما تاني، وفي مثل بيقول حُسن السوق ولا حُسن البضاعة.
