أرملة تاجر المقطم المقتول بالتحقيقات: جوزي كان بيشغل الفلوس للناس وبيكتب على نفسه شيكات | خاص
قررت المحكمة المختصة، إحالة المتهمين بقتل تاجر وإلقاء جثته بالطريق العام، لفضيلة المفتي لأخذ الرأي الشرعي في إعدامهما، بتهمة قتل تاجر عمدًا مع سبق الإصرار والترصد، بسبب خلافات مالية نشبت بينهما، وحددت جلسة 11 يونيو القادم لنظر رد المفتي.
مقتل تاجر المقطم
وحصل القاهرة 24 على التحقيقات في القضية، واستدعت جهات التحقيق أرملة المجني عليه تاجر المقطم، وجاءت أقوالها كالتالي:
س: ما صلتك بالمتوفى أبو الحمد حمدان؟
ج: ده زوجي منذ عام 2005 حتى تاريخه ومخلفة منه 5 أولاد وساكنين في المعراج بالبساتين - القاهرة.
س: ما هي طبيعة عمل زوجك تحديدا؟
ج: هو كان شغال موزع للغراء بتاع المطبوعات في شركة، وبعد كده ساب الشركة وبدأ يشتغل نفس الشغلانة بس مع نفسه، وبعد كده بدأ يشتغل موزع لبكر السولوفان الخاص بالطباعة برضه مع نفسه، ومؤخرا بدأ ياخد فلوس من ناس عشان يشغلهالهم مقابل أرباح بيديهالهم مع أصل المبلغ.
س: منذ متى تحديدا ويعمل زوجك في تلقي الأموال وتشغيلها؟
أنا مش فاكرة بالظبط لكن هي من فترة كبيرة مش قادرة أحدد من كام سنة بالظبط، وكنت عارفة منه إنه بياخد مبالغ صغيرة بس الموضوع بدأ يكبر معاه مؤخرا.
س: ما هي كيفية تلقي زوجك لتلك المبالغ وكيفية ردها مرة أخرى لأصحابها؟
ج: أنا أعرف إنه هو بياخد الفلوس سواء من قرايبه أو معارفه، وفي الحالة دي ما بيكتبش ورق على نفسه، ولكن لما بياخد فلوس كبيرة ساعتها جوزي بيكتب ورق على نفسه عشان يضمنلهم حقهم مقابل إن هو بيديهم أرباح وأصل المبلغ ولكن معرفش المدة ولا المبالغ وبالنسبة للأشخاص اللي خد منهم فلوس، واحد جوز أخته وبنت عمته وأخوه والناس المقربين منه.
س: هل شغل زوجك بنفسه تلك المبالغ حتى يتحصل على الأرباح منها؟
ج: لا هو كان بيديها لناس يشغلوها وبياخد منهم الأرباح وأصل المبلغ عشان يردها لأصحابها بعد ما ياخد نسبته.
س: خلال الآونة الأخيرة هل كان زوجك يعمل في تشغيل الأموال؟
ج: أيوه وهو كان بياخد البضاعة من تجار منهم شخص وبيكتب على نفسه شيكات وبعد كده بيبيع البضاعة وهو عمره ما اتأخر في السداد.
س: خلال الآونة الأخيرة ما هي الحالة المادية التي كان عليها زوجك؟
ج: هي الحالة المادية اتحسنت لكن أنا وزوجي اتفقنا إن إحنا نحاول نوفر لأولادنا مكان أحسن من اللي قاعدين فيه وساعتها بعنا الشقة اللي أنا ساكنة فيها بمليون و200 ألف جنيه ودفعناهم في مقدم فيلا في كومباوند اسمه جولدن جيت وزود على المبلغ ده دفعات تانيه لغاية ما وصل لمليون و550 ألف جنيه، وكان الباقي هيتدفع على أقساط عشان يكمل المبلغ لـ3 ملايين جنيه تقريبًا.
س: خلال تلك الفترة هل تعثر زوجك ماديًا لرد المبالغ والأرباح لمستحقيها؟
ج: لا هو مكنش حد بيطالبه بالفلوس ولكن أنا كنت بسمعه بيكلم واحد بيطلب إن هو يرجعله أصل المبلغ، ومش عاوز الأرباح عشان يرجع للناس فلوسهم، وكمان كنت بسمعه وهو بيكلم حد ويطلب منه أرباح المبالغ اللي مديهاله.
س: ما هي صلة زوجك بالسابقين وما هي كامل بياناتهما؟
ج: اللي أنا عرفته من جوزي إن ده راجل يعرفه من قبل ما أنا أتجوزه، وكان بياخد منه ملابس عشان يبيعها قبل الزواج ولكن معرفش اسمه إيه ولا ساكن فين.
