محمد رياض: لم أتردد في تولي رئاسة المسرح القومي ولكني تخوفت وحلمي أضيء برج القاهرة باسم المهرجان
تحدث الفنان محمد رياض عن المسرح بمناسبة توليه رئاسة مهرجان المسرح القومي مؤخرًا، مشيرًا إلى أن المسرح يعد لقاء حي بين الفنانيين والجمهور وهو حائط صد للأفكار المتطرفة.
وأضاف محمد رياض في تصريحات تليفزيونية: المسرح يعتبر حائط صد للأفكار المتطرفة لأنه بيجذب الشباب بشكل كبير جدًا بخلاف الأسر كلها، وخاصة الشباب اللي عايز يمثل بيبدأوا من المسرح، وأنا شخصيًا بدأت من المسرح.
المسرح حالة خاصة جدًا
وأردف محمد رياض: المسرح حالة خاصة جدًا، ومهرجان المسرح القومي بيضم حاجات كتير وفعالياته 13 يوم، وعندنا 10 مكرمين السنة دي لأسماء كبيرة جدًا، إحنا بنعمل لجنة مشاهدة للعروض، والمكرمين اختارناهم السنة دي بعناية شديدة جدًا لكل من له دور مؤثر في المسرح، وكرمنا الأحياء فقط، وطبعًا الراحلين لهم كل التقدير والاحترام، ولكن الإنسان محتاج يتكرم في حياته.
وأكد محمد رياض: مترددتش في تولي رئاسة مهرجان المسرح القومي ولكني خوفت لأنها مسؤولية كبيرة، وأنا بحب لما أتولى مسؤولية أعمل كل ما يتم عمله ومدي كل وقتي وشغلي للمهرجان الفترة دي، أنا مش عارف أفكر في شغلي عندي مسلسلات وبصور بالفعل ولكن مش عارفة أفكر في حاجة غير المهرجان، فبعمل كل اللي ربنا يقدرني عليه في المهرجان لأني مؤمن جدًا بالمسرح والمسرحيين، ومن الحاجات اللي بحلم بيها إني أنور برج القاهرة بـ اسم المهرجان، ونفسي أعمل أفيشات للمهرجان في كل مصر، ولكن بيواجهني مشاكل مادية أنا محتاج رعاة وأنا مكلم كذا شركة وإن شاء الله يمكن الفترة اللي جاية يكون في رعاة لمهرجان كبير زي ده.
وواصل: المركز القومي للمسرح بدأ في تسجيل العروض بشكل احترافي، لأن كل مسرحية انتجت هي تراثنا المسرحي وده تاريخنا، وفي مسرحية حباك عوضين تامر، أستاذ يوسف داوود قال لي أنا حاسس أن دي هتكون آخر مسرحية ليا وعايز أصورها، وفعلًا كانت آخر مسرحية ليه وجملته أثرت فيا جدًا، وللأسف معرفتش أصورها
